Waktiinooy, Baaxooy, Amaana Kee Saay Caagiidal Walalak, Agatak Amaana Malah Buxa Tece Maybalaalaqa

              Massakaxxa Le Ni Baaxoh Ummatta,

Itiyoppiyak Xer Dabaanah Sugte Baaxo Xisneh Aydaadul, Siyaasa Baxsaay, Sittin Wayti Kee Booditte Salaam Gital, Yaabal, Walal Kee Madqa Gital Calli Akah Abtaamih Abak Raag Mali.

Sami Sinnah Ni Siyaasa Amolladi Foyyah Tan Siysaasa Kinni.

 

Ni Baaxol Tamixxigeh Tanimi Caylal Aysuk Reeda Yibbixeh Yan Cayli, Caylal Gacak Reedak Obam Fan Inkih Sittat Koobahissak Lowsiisaanam Kee Faxxa Heenim Elle Aban Siyaasa Qaada Kinni.

Milaagi Doolat Reeda Fan Elle Temeetem Caylal Hinna. Aham Kaaduk Qusba Siyaasa Qaada Kinni. Ahim Qusba Siyaasa Mafdaga Diggossam Kee Kalah Tan Salaam Le Siyaasa Qaada Kaaduk Demokraasi Gital Dooro Ummattah Oggol Geyak Doolatah Xissimaanam Tuybulle. Ahak Taturak Baxaabaxsa Le Siyaasa Missoynaanih Mirocti Kee Adoytit Doolat Miraaciinul Madabah Haak, Itiyoppiya Sitta Lih Lino Buxa Kinnim Sumaaqissem Kinni.

 

Salaam Gital Siyaasa Tabsi Dibuk Madma Hinna. Kalah Tan Madmoomi Arac Akah Xagtannah Silaac Kinnikkal Dibuk Madma Matakka. Itiyoppiyah Taqabi Awayi Gexso Missooysaanamal Dibuk Calli Mageytima. Aydaadul Nagarneh Nan Diglo Missoosaanam/Gacsaanama Dirki Kinni. Tama Aydaadi Diglo Missoosoonuh Sidiica Qaynatih Callitte Akah Daffeyteh Geytimta. Sugeh Yan Siyaasa Taqabi Agat Caddibnih Agaaradal Yafxigeenimiiy, Xayi UdduurihSiyaasa Taqabi Kaaduk Tabsi Qadli Kee Aygadadal Missoosaanama.

Itiyoppiyal Yan Caalata, Inki Doolat Doorol Mayso Orbisak Reeda Tabbixeemih, Dibuk Margaqa Elle Tacem Duude Waytaamaay, Baaxo Kee Gabat Assogolla Le Agaaraditte Faxxah Tan Caagiida Tan. Tama Xongolo Tantabbem Qimmissa Away Garab Boloolih Sanat Akak Gufeh Geytima. Ila Milaagi Doolat Temeeteh Tan Udduuri Fan Tabbem Geyteh Masuginna.

Milaagi Doolat, Tama Mabla Harigaanam Dibuk Hinnaya, Tahim Abbinossah Tan Waalik Tan Fanteena Akah Xisse.

Tama Fanteenah Addal Masuuliyyatal Daffeyteh Tanimi, Fayya Le Caddoh Abak Raag Kee Dudda Leh Tan Komishineeritte Kinnon. Ta Komishineeritte Gabah Assagolla Le Agat Agaarad Akah Abbinoosan Innah Baar Le Reeda Madqal Akah Tontocowweh Geytimta.