Aysaqiiti Magaalal Meqem Abittoh Eglah Qokolut Xissimte Madabak Nahar Barittoh Buxa Dooqaysen.

 

Addis Ababa Qunxagarabluk 06/2018 (ENA) Plan International Ethiopia meqem abittoh Egla 10 Biliyeenik Amo Takke Lakqot Xisse Barittoh Buxa Dooqayseenim Qaddoysen.

Plan International Ethiopia meqem abittoh egla Aysaqiiti Magaalak Simbilleh barittoh buxal 10 Million kee 800 boolih alfit xisne taama akkak abteh tan Madabak afa barittoh buxa Dooqasse.

 

Tama Dooqaysoh Aracal Rakaakayak Barittô Biirok Naharsi Saqal Muusa Adam kee Biirok Miraaciini Makaadoh adoytiitiiy, Magaala Miraaciinuuy, plan international Ethiopia Awlaytit kee Barteenit xaltanii awda Miraaciini elle geytimak Dooqaysen.

Tama taddeeral Magaalak Leeda massoynah saqal, Amiin Yasiin Magaala Awlisak yab abeek lakal, Rakaakayak Baritto Biirok Naharsi Saqal Muusa Adam Qumar abeh yan yaabal iyyeemih Plan international Ethiopia meqem abittoh egla Rakaakay caddol baritto luddal mangoh yan qokol abak geytimtam qaddoyseek lakal Simbilleh baritto buxal xiseenih yan caddo tangeh tan Madabak afa barittoh buxah xisne kalah adda mansoofa kibak abeenih yanin kulsale taamah Baritto Biiro kee Qafar Ayyuntih migaaqal kulsale gadda keenih gacisa axcuk Magaalah ayyunta kee Barteenit xaltani baritto buxay keenih xiseenih yaniini dacrisak coox akah elle daabisan innah farmô keenih tatruse.

Illacabol, Plan international Ethiopia meqem abittoh eglay xisne taama abteh tanih Baritto Biirok Naharsi Saqal Muusa Adam faatit acwa keenih acayuk taddeerak Amogacsa abeenim Rakaakayak Barittô Biiroh Oyti Diggoysa.