Kilbatti Rasih Kasle Luk Wakti Caalat Wagittaamal Walal Gudgud Gexisak Geytiman

 

Addis Ababa,Ximolik 14,2018 (ENA) Qafar Agatih Rakakayih Doolatak Kilbatti Rasuk Abqaala Magaalal Kilbatti Rasih Kasle Luk Wakti Caalat Wagittaamal Walal Gudgud Gexisak Geytiman Qaddosen.

Rakaakayak Saay kee Salaam Biiroh Koobaahissol Kilbatti Rasuk Inkih tan Daqoorit kee Magaala Xiinisssok Tewqeh tan Rasi Idoolay, Kedoh Abbobtiiy, Qunxaaneyta kee Sayyoh Exxaaxi Luk Wakti Caalat Wagittaamal Walal Gudgud Rasi Inyta Abqaala Magaalal Gexsak Geytiman.

Tama Gudgudul Rakaakayak Ciggiila Prezixentih Bilhadal Madduur Kilasterih Koobaahiseey, Plaan Kee Daddoos Biiroh Saqal Gifta Qali Macammad Macmuud, Rakaakayak Saay kee Salaam Biiroh Saqal Komishineer Acmad Cummad, Rakaakayak Buqre Kee Gino Gaddih Daddoosih Biiroh Saqal Injineer Yaasin Qali, Qafar Poliisik Daga Raaqa Miracsentak Baatil Kalalih Langil Ciggiila Amriseeni C/Komishineer Macammad Siraaj Edde Anuk Rakaakayay Rasu Kee Daqoorit Miraaciini Edde Tengele.

Gudgudul Geytimeh Yan Rakaakayak Ciggiila Prezixentih Bilhadal Madduur Kilasterih Koobaahiseey, Plaan Kee Daddoos Biiroh Saqal Gifta Qali Macammad Macmuud Iyyeemih Qafar Idoola Isiim hinnay Marin-im Abak Assa Idoola Kinnim Ascassuuk Qafar Taway Geyteh tan Isi-amoh Xin Waaruh Adda Kee Irok Salaam Isinnik Dacrisaanam Faxxintah Tanim Diggoose.

 

Salaama Yaanam Num Isiik Qimbisak Abbinoosam Kinnim Yescesseh Yan Rakaakayak Saay Kee Salaam Biirok Naharsi Saqal Komishineer Acmad Cummad Qafar Ummatta Xakak Wayti kee Salaam Sinna Fan Culussam Xiqta Caagiidak Kalaloonuh Kulli Num Isik Qambalsintam Abam Faxxintah Tanim Ascassuuk Qafar Ummattah Goona Luk Gacak Baahan Curriyatay Qambaalaana Ane-Waam Ummatta Taaxigem Faxxinta Iyye.

Komishineer Acmad Cummad Taturte Udduurah addat Qafarak Kedoh abbobti Ganeenit kee Ken Qokoltah tan Marittel Gexxam Faxxinta Maaqatta Axcuk Madaqeenih Yanin Madqak addafokoot Maca Ceelam Kee Missos Faxxam Tenek Abeh-Meqem Wagittaamal Baar Luk Xayyoosak Rasi Kasle Fidin Walal Edde Abte.

Kilbatti Rasuk Naharsi-Saqal Gifta Macammad Qali Ascab Is Le Katuk Iyyeemih Qafar Ummattah Salaam Kee Sabahalal Maqarroowuh Doolat Abteh tan Seeco Assakaxxuk Temeeteh tan Rasi Kasle Faatite.

Gudgudul Tengeleh tan Kilbatti Rasuk Inkih tan Daqoorit kee Magaala Xiinisssok Tewqeh tan Rasi Idoola Ganeenit Kee Gargarwa Qafarah Bahtu Wayta Curriyat Anewaam Aaxaguk Ummattah Addah addat Salaam Kee Saay Uguugus Abak Geytimaanam Kassiiseenik Lakal Ganeenit Uxi Kinniih Qafar Naqboytiit Kinnim Ascassuuk Missos Faxxa Ximmoomal Baar Luk Walalak Geytimanam Qafarak Mangaffa Rettimah Oyti Yescesse.