Afrikah inkittinaaneh egla kee Awroppa Inkiinoh eglah kobox Addis Ababal gexisak geytima - ENA Qafar Afa
Afrikah inkittinaaneh egla kee Awroppa Inkiinoh eglah kobox Addis Ababal gexisak geytima
Agda baxisso 27 2016
Afrikah inkittinaaneh egla kee Awroppah Inkiino Qaafiyat luddal loonuh yanin qokol kee fantaaxaw akah diggoysan innah hadaf leh yan Fayya le kobox kinnih tanim baxxaqisen.
Ta koboxul Afrikah inkiinoh eglah Komshiinik Qaafiyataay, binaadamiinô caagiida kee ayyuntiinô daddoosih Komshiineerih yan Minaata Samate Seesumma Kee Awroppah inkittinaaneh eglak Qaafiyat kee maaqiddi amnih Komshiineerih tan Setela Kiriyaakixis elle geytimteh tanim qaddoysen.
Ossitinah Afrikak Dalkâ Kalalu kee aftabi fanteenàk (SiXiSi Afrika) miraaciinuy, Beljiyeemik Naharsi qokleenaay, magaalooluk Leenah malaakah yan Kaaroolin Jenez Kee Afrikah inkittinaaneh eglay, Awroppah inkittinaaneh eglah adoytit kee awlaytit edde tengeleh geytimtam qaddoysen.
Ta kobox missosseh tanim Afrikah inkittinaaneh Komshiinik Qaafiyatay, binaadamiinô caagiida kee ayyuntiinô daddoosih exxa Kee Afrikah inkiinoh egla kinnih tanim yiysixxigen.
Afrikah inkittinaaneh egla kee Awroppah Inkiinoh egla Qaafiyat luddal loonuh yanin baad caddoh qokolitte akah diggoysan inna kee namma xagorti binaadamiinô qokolih caagiidal baar le walal abe loonum qaddoysen.
Itiyoppiyah Xaagih raceenah xaagi elle yascassennal, koboxuk gamadal Awroppah inkittinaaneh egla kee Afrikah inkiinoh eglah Komshiin mango qaynatih qokolittel sittin gey feram abeloonu axcuk qambaalan.
Fooca fanah mangih Afrikah gaysak yamballeeh yan Binaadamiinô qokolih fayxi kiboonu Kee sittin catot abak geytimaanah yanin taamoomi alhum rakiibo abak agaarade loonum ta koboxuk qambaalan exxa kinnim yiysixxigen.
Awroppah Inkiinoh egla kee awlaytiawlaytiitih tan baaxooxa Afrika kee Awroppah Inkiino Qaafiyat caagidil baxsa le hangisso adda faknu elle abak sidiica ayroh gideh gufne Kee walal abeloonum yiysixxigen.
Ta gufnet 2024 Awroppah inkittinaaneh eglah Persedentih tan Beljiyeem ubka le saqalá qaafiyat ayfaafay inki gid takke wadbisso yaaluh Kee Qaafiyat wagittaamal,Afrika Kee Awroppah inkittinaaneh eglaali sittinfanal loonuh yanin qokol akah diggoysan innah hadaf loonuh yaniinim yiysixxigen.
Away Awroppah inkittinaaneh eglak Persedent Beljiyeem Afrika lih cattiimak A. L. L. 2024 Qado dirrih alsat Birisleesil Qaafiyatal hangi le fayyo kobox gexsitelem yiysixxigen.
Dabboh xiinak Afrikah inkittinaaneh egla kee Awroppah Inkiinoh egla kobox A. L. L. 2022 Beljiyeemik Bireslees magaalal gexsiteh sugem Kee namma xagorti Qaafiyat luddal loonuh yanin fantaaxaw diggoysoonuh fayxi loonum qaddoyseenih sugeenim kassinna.
Afrikah inkiinoh eglaa Kee Awroppah inkittinaaneh eglak baxsale fantaaxawah qaafiyat exxah koqol yamixxige.
Awroppah Inkiinoh eglak Investment Banki kee Afrikak mawqa Kee culma (export and import) Banki saharak addah tan baaxooxal Qaafiyat gexsitih maysaasa akah takkennah iffooseh yan 200 miliyeenih Yuuro ta fantaaxawak qimbô ceelallo kinnim tamixxige.