Jiraattonni Magaalaa Amboo  Qonna  magaalaan  fayyadamoo  ta’aa  jiru 

Sadaasa23/2018(TOI )–Jiraattonni Magaalaa Amboo Qonna magaalaarratti bobba’an  nyaatarra darbuun  fayyadamummaan Diinagdeesaanii   guddachaa dhufuu dubbataniiru. 
Jiraattonni  Magaala Amboo Qonna  magaalaan  hojii misooma  kuduraa fi muduraarratti bobba’an  misoomichaan  nyaata  madaalawaa  maatiisaaniif  dhiheessuurra darbee  galii dabalataa argachuun  fayyadamummaan diinagdeesaanii  guddachuu  dubbataniiru. 
Namoota hojicharratti bobba’an  keessaa  Qonnaan  bulaa Zarihuun Ayaalqibbat Yaada TOI’f kennaniin akka ibsanitti, lafa xiqqaa qabanirratti  Timaatimii Misoomsuun  nyaata maatiisaaniirra darbee  gabaaf  dhiheessuun  galii dabalataa  argataniiru. 

 kuduraa  gabaaf dhiheessanii gurguranirraa  qusachuun  sa’a Aannanii bitachuusaanii dubbataniiru. 
Bu’aa misooma kuduraa yeroo yeroon ilaaluun  yeroo ammaa  hojicha babal’isuun  qullubbii diimaa fi  kuduraa fi muduraa  biroo  misoomsuusaanii dubbataniiru. 

Qonnaan  bulaa biroon misooma magaalaarratti bobba’an Obbo Zagayyee   Akkawaaq  gamasaaniin misooma  kuduraa osoo hin eegaliin  dura  baay’ee fayyadamoo akka  hin  turre ibsaniiru. 
Deeggarsa ogeeyysa Qonnaarraa argatan fayyadamuun  Qonna  Magaalaarratti bobba’uun  sirna sooratasaanii fooyyessuu fi  galiisaanii guddisuuf hojjechaa jiru. 

Kanaanis Dinnichaa fi qullubbii Adii  misoomsuun  fayyadamummaansaanii  guddachaa dhufuu  dubbataniiru. 
Bakka bu’aan Itti gaafatamaa wajjira Qonnaa  Magaalaa Amboo Obbo Taakkalaa Kumsaa akka  jedhanitti, magaala Ambootti qaama  sagantaa Maaddii guutuu  kan ta’e Misoomni kuduraa fi muduraa  wabii nyaataa fi  caarraa hojii uumuuf deeggaraa jira. 
Magaalichatti misooma jallisii Boneen lafa hektaara  95 Kuduraa fi muduraa misoomsuuf karoorfame keessaa yeroo ammaa lafti hektaarri 36  kuduraa fi muduraan facaafamuu dubbataniiru. 

Jiraattonni magaalichaa sagantaa maaddii guutuurratti hirmaachuun  kuduraa fi muduraa  misoomsuun  nyaata  madaalawaa argatanii galiisaanii  akka guddifataniif deeggarsii fi hordoffiin taasifamaa jiraachuu  ibsaniiru.