Misoomni bakkeewwan hawata turizimii damichaaf gumaacha olaanaa buuseera

Sadaasa 20/2018(TOI)-Mootummaan xiyyeeffannoo misooma bakkeewwan hawwata turizimiif kenneen damicha haala olaanaan dadammaksuun,guddina diinagdeef shoora olaanaa bahachaa jira.

Dameewwan Itiyoophiyaan yeroo dhiyoo asitti diinagdee adda addaa ijaaruu irratti xiyyeeffattee hojjechaa jirtu keessaa tokko turizimiidha.

Kanaanis bakkeewwan haaraa hawwaata turizimii ta’an misoomsuufi kan kanaan dura turan haaromsuun bal’inaan hojiirra oolaa kan jiru yoo ta’u, kunis yaa’insa turistootaa dabaluun cinatti guddina diinagdee biyyaafis shoora olaanaa bahachaa jiraachuu ibsameera.

Pireezidaantiin Waldaa Tuur Opereetar Itiyoophiyaa obbo Fitsum Gazaanyi TOItti akka himanitti, mootummaan damee turizimii utubaawwan diinagdee shanan keessaa tokko taasisee fudhachuun hojiin hojjete bu'aa argamsiisaa jira.

 

Kunis dameen turizimii diinagdee biyyaa keessatti gaheen inni qabu guddachuu eeraniiru.

Turizimii biyya keessaa babal’isuun barbaachisummaa hawaasummaa fi diinagdee damichaa guddisuu qofa osoo hin taane, hariiroo hyawasummaa cimsuuf gumaacha olaanaa qaba jedhan.

Itiyoophiyaan bakkeewwan hawwata turizimii misoomsuu fi beeksisuuf hojiiwwan hojjette biyyoota biroof muuxannoo ta’uu kan danda’u raawwachuu akka dandeesses ibsaniiru.

 

Kunis dorgomtummaa damee turizimii fi faayidaan diinagdee namoota damee kanarratti hirmaatan akka dabalu taasiseera jechuun ibsaniiru.

Akka abbaan qabeenyaa fi hoji gaggeessaan dhaabbata ‘Teemaa Tuur Itiyoophiyaa’’ Tewoodiroos Solomoon jedhanitti, misoomni bakkeewwan hawwata turizimii qabeenya turizimii Itiyoophiyaa addunyaaf beeksisuuf gargaareera.

 

Itti dabaluunis, misoomni bakkeewwan hawwata turizimii carraa hojii damichaa babal’isuuf haala mijataa uumeera jedhan.

Ministeera Tuurizimiitti Daarektarri Olaanaa Damee Piroomooshinii obbo Tashoomaa Takiluu akka ibsanitti, mootummaan damee turizimii haaromsuu fi gumaacha dinagdee keessatti qabu guddisuuf tarkaanfii fudhachuu isaa ibsaniiru.

 

Xiyyeeffannaan damee turizimiif kenname carraa hojii uumuu fi yaa’insa turistootaa dabaluu keessatti gumaacha olaanaa kan qabu yoo ta’u, galiin damicharraa argamu akka dabalu taasiseera jedhan.