Godinichatti qonna jallisii qamadii Boneen lafti heektaarri kuma 16 ol sanyiin uwwifameera - ENA Afaan Oromoo
Godinichatti qonna jallisii qamadii Boneen lafti heektaarri kuma 16 ol sanyiin uwwifameera
Sadaasa 20/2018(TOI)- Godina Harargee Lixaatti qonna jallisii qamadii Boneen lafti heektaarri kuma 16 ol sanyiin uwwifamuu waajjirri qonna godinichaa beeeksise.
Akka Waajjirri Qonnaa fi Misooma Qabeenya Uumamaa godinichaa ibsetti, misooma qamadii jallisii Boneen misoomsuuf lafa heektaara kuma 81 ol marsaa lamaan karoorfamee hojjetamaa jira.
Waajjirichatti dursaan garee misooma qamadii obbo Habiib Abdulkariim TOItti akka himanitti, baatii Fulbaana darberraa eegalee lafti heektaara kuma 24 ol qotuun sanyiif kan qophaa’e ta’uu eeruun, kana keessaa heektaarri kuma 16 ol sanyiidhaan kan uwwifame ta’uu ibsaniiru.
Lafti hanga ammaatti sanyiidhaan uwwifame irra caalaan isaa, qonnaan bultoota waldaadhaan gurmaa’anii fi paampii ykn motora bishaaniin hojjetu fayyadamuun kilaastaraan kan misoomsaman ta’u himaniiru.
Erga misoomni qamadii jallisii Bonee godinicha keessatti eegalamee kaasee hammi lafa misooma kanaan uwwifamee fi hirmaannaan qonnaan bultootaa waggaa waggaan dabalaa dhufeera jedhan.
Waajjirichatti dursaan garee itti fayyadama jallisii fi hirmaannaa uummataa obbo Abdallaa Muzammiil akka jedhanitti; bara kana qonnaan bultoota misooma kanarratti hirmaataniif paampii ykn motoroota bishaan harkisan kuma lamaa ol raabsuuf kan karoorfame yoo ta’u, hanga ammaatti walakkaa ol kan raabsame ta’uu ibsameera.
Itti aanaan bulchaa aanaa Gammachiis obbo Ramadaan Abdurahamaan akka jedhanitti, Aanichatti bara kana lafa heektaara kuma 10n misooma qamadii jallisii Boneen misoomsuuf karoorfame keessaa hanga ammaatti lafti heektaara kuma lamaa ol sanyiin facaafamuu himaniiru.
Inishiyeetiiviin Misooma Qamadii Jallisii Bonaa aanichatti erga hojiirra oolee as misooma qonnaa keessatti haaromsi akka mul’atee fi qonnaan bultoonni yeroo isaanii guutuu itti fayyadamuun, bishaan lafa jalaa paampiin harkisuun misooma qonna jallisii Bonee irratti hirmaachaa jiraachuu eeraniiru.
Godina Harargee Lixaatti bara darbe lafa heektaara kuma 80 qamadii jallisii Boneen misoome irraa kuntaala miiliyoona lamaa ol argameeera.