Godina Iluu Abbaa Booritti lafa hektaara kuma 17 ol irratti mi’eessituuwwan adda addaa misoomaa jira

Sadaasa 20/2018(TOI)- Godina Iluu Abbaa Booritti lafa hektaara kuma 17 ol irratti mi’eessituuwwan adda addaa misoomu waajjirri qonnaa Godinichaa ibse.

Itti Gaafatamaan waajjira Qonnaa Godina Iluu Abbaa Boor obbo Chaalaachoo Addunyaa Godinichatti lafa hektaara kuma 17 oliirraa calla kuntaala Kuma 800 ol walitti gabuuf hojjetamaa jira jedhaniiru.

 

Godinichi misooma Qonnaaf humna qabu gara bu’aatti jijjiiruun fayyadamummaa qonnaan bulaa guddisuuf galtee fi sanyii filatamaan dhihaachuu dubbataniiru.

Godinichatti misooma mi’eessituuwwaniif haala mijataa jiru fayyadamuun Qonnaan Bulaan Kororimaa, Barbaree,gijinbilaa fi Irdii misoomsuun Dinagdeesaa akka guddisuuf deeggarsaa fi hordoffiin taassifamaa jira.

 

Qonnaan Bultoota Misooma mi’eessituuwwan adda addaarratti bobba’an keessaa jiraataa Aanaa Mattuu ganda Burruusaa Obbo Jamaal Usmaan akka jedhanitti lafa qabanirratti Kororimaa Misoomsuu eegaluun waggoota muraasa keessatti fayyadamaa ta’uu dubbataniiru.

 

Waggaa darbe kororimaa misoomsanirraa galii birrii kuma 100 ol waan argataniif hojicha babal’isuun bara omishaa kanatti garii birrii kuma 300 ol argachuuf cimanii hojjechaa jiraachuu ibsaniiru.

Godinichatti jiraataan Aanaa Buree obbo Bafiqaaduu Abdiisaa gamasaaniin, lafa hektaara walakkaarratti barbaree omishuun birrii kuma 100 ol argachusaanii dubbataniiru.

 

Fayyadamummaa misoomicharraa argatan guddisuuf hojicha caalatti babal’isuun akka hojjetan kaka’umsa isaaniif uumuu ibsaniiru.

Obbo Usmaan Taaffasaa gamasaaniin hojii misooma Barbareen jireenya Dargaggootaa fi jiraattota hawaasa naannichaa hedduu jijiiraa jiraachuu kaasuun kunis hojichaaf xiyyeeffannoo akka kennan isaan taassisuu dubbataniiru.

Hojii barabaree bara darbeerraas galii birrii kuma 200 tti dhihaatu argachuusaanii dubbataniiru.