Badhaasni Miidiyaa “IGAD” sadaffaan har'aa fi boru magaalaa Finfinneetti gaggeeffama

Sadaasa 20/2018(TOI)- Sirni Badhaasaa IGAD Miidiyaaf qopheesse marsaa 3ffaan bara 2025 har'aa fi boruu magaalaa Finfinnee Hoteela Iskaaylaayititti gaggeeffama.

.Badhaasni baranaa kun mata duree "Gabaasa haala qilleensaa bu’a qabeessa ta’e, riijinii nageenya, jabinaa fi tasgabbii qabuuf’" jedhuun kan qophaa’e ta’uun himameera.

IGAD sagantaa badhaasaa baranaa kana mootummaa Itiyoophiyaa waliin ta’uun kan qopheesse yoo ta’u, dameewwan 10 irratti dorgomtoota injifatan ni badhaasa jedhameera.

Miidiyaan ‘Pulse of Africa’(POA)n michuu miidiyaa addaa badhaasichaati. Baankiin Afrii’egziim sagantichaaf deeggarsa taasisuu beeksiseera.

Badhaasni bara kanaa gaazexeessitootaa fi ogeessota fiilmii jijjiirama qilleensaa bu’a qabeessa ta’e Gaanfa Afrikaa keessatti galmeessaniif beekamtii kenna.

IGAD ibsa TOIf ergeen, sagantaa guyyoota lamaaf turu kana keessatti gabaasaalee fi yaadota haala qilleensaa ciccimoo, akkasumas tumsa naannoo irratti xiyyeeffachuun gabaasni kan dhiyaatuu fi ilaalaman ta’uu ibseera.

Badhaasni Miidiyaa IGAD bara 2025 dameelee 10n kan gaggeeffamu yoo ta’u,

gosoonni badhaasichaa Gaazexeessummaa Maxxansaa, Gaazexeessummaa Raadiyoo, Gaazexeessummaa Televizhiinii, Miidiyaa Dijitaalaa, Suuraa kaasuun, Gabaasa Afaan Dhalootaa/Biyyoolessaa, dhiibbaa uumaa waggaa/kalaqa qabiyyeen, Dhiibbaa uumtota Miidiyaa Hawaasaa, fi Badhaasa Ga’umsa Umurii guutuu ta’uu ibsameera.

Badhaasni Miidiyaa IGAD bara 2023 irraa eegalee waggaa waggaan kan gaggeeffamu yoo ta’u, badhaasni bara 2023 Jibuutiitti, badhaasni bara 2024 immoo Keeniyaa Naayiroobiitti kan gaggeeffame ta’uun isaa ni yaadatama.