የብሔሮች፣ ብሔረሰቦችና ሕዝቦች ቀን አብሮነትና አንድነት የሚጠናከርበት ነው

አዲስ አበባ፤ ህዳር 20/2018(ኢዜአ)፦ የብሔሮች፣ ብሔረሰቦችና ሕዝቦች ቀን ባህላቸውንና ማንነታቸውን ለማስተዋወቅና የሌሎችን ባህል ለማወቅ እድል የሚፈጥር መሆኑን በመርሃ ግብሩ ላይ የተገኙ ተሳታፊዎች ገለጹ፡፡

የአዲስ አበባ ከተማ አስተዳደር 20ኛው የብሔሮች፣ ብሔረሰቦች እና ህዝቦች ቀን በከተማ ደረጃ የማጠቃለያ መርሃ ግብር አካሂዷል፡፡

በመርሃ ግብሩ የታደሙ ነዋሪዎቸ ለኢዜአ በሰጡት አስተያየት እንዳሉት፤ ቀኑ ብሔሮች፣ ብሔረሰቦችና ሕዝቦች ባህላቸውንና ማንነታቸውን ለመግለጽና የሌሎችንም ለማወቅ እድል የሚፈጥር ከመሆኑ ባሻገር አብሮነትን ያጠናክራል።

የብሔሮች፣ ብሔረሰቦችና ህዝቦች ቀን መከበር ህብረ-ብሔራዊ አንድነትንና ወንድማማችነትን በማጠናከር የአብሮነት  እሴትን እንደሚያጎለብት ነዋሪዎቹ ገልጸዋል።

 

አስተያየታቸውን ከሰጡት መካከል ከድር ዱላ እንዳሉት፤ ቀኑ ብሔሮች፣ ብሔረሰቦች እና ሕዝቦች ባህላቸውን፣ ቋንቋቸውንና ማንነታቸውን እንዲያስተዋውቁ እንዲሁም ሀገራዊ ስሜት እንዲጠናከር ያግዛል። 

 

አቶ ሰይፉ ለማ የተባሉት የመዲናዋ ነዋሪ በበኩላቸው፤ የቀኑ መከበር የህዝቦች አንድነትና ትስስር የበለጠ እንዲጠናከር ያግዛል ብለዋል።
የቀኑ መከበር ኢትዮጵያውን ለሀገራቸው እድገት በጋራ እንዲሰለፉ አስተዋጽኦ እንዳለውም ጠቁመዋል።

 

የብሔሮች፣ ብሔረሰቦችና ሕዝቦች ቀን የሀገር ፍቅር እንዲሰርጽና የህዝቦች እሴት ጎልቶ እንዲወጣ ያደርጋል ስትል የገለጸችው ደግሞ ወጣት ኢየሩሳሌም ሰማልኝ ናት።

ቀኑን ብሔሮችና ብሔረሰቦች በጋራ፣ በእኩልነትና በመከባበር ማክበራችን ለአብሮነታችን ወሳኝ ነው ብላለች።

ወይዘሮ ድጋፏ አሸናፊ በበኩላቸው፤ የብሔሮች፣ ብሔረሰቦችና ህዝቦች ቀን መከበር ህብረ-ብሔራዊ አንድነትንና ወንድማማችነትን ያጠናክራል ብለዋል።

አስተያየት ሰጪዎቹ ብዝሃነታችንን በማክበር ለሀገራችን ለውጥና ዕድገት በጋራ መቆም አለብን ሲሉም ተናግረዋል።

 

20ኛው የብሔሮች፣ ብሔረሰቦችና ሕዝቦች ቀን "ዲሞክራሲያዊ መግባባት ለህብረ ብሔራዊ አንድነት" በሚል መሪ ሃሳብ በፌዴሬሽን ምክር ቤት አስተባባሪነት በማዕከላዊ ኢትዮጵያ ክልል አስተናጋጅነት ህዳር 29 ቀን 2018 ዓ.ም በሆሳዕና ከተማ ይከበራል።