በሲዳማ ክልል በሌማት ትሩፋት መርሃ ግብር ለዶሮ እርባታ ትኩረት ተሰጥቷል

ሀዋሳ፤ ህዳር 20/2018(ኢዜአ)፦ በሲዳማ ክልል በሌማት ትሩፋት መርሃ ግብር ለዶሮ እርባታ የአንድ ቀን ጫጩት አቅርቦት ላይ ትኩረት መሰጠቱ ተገለጸ።

በሲዳማ ክልል ሀዋሳ ዙሪያ ወረዳ የሚገኘው አዳሬ የዶሮ እርባታ ኢንተርፕራይዝ የአንድ ቀን ጫጩት ለተጠቃሚዎች የማቅረብ ሥራ በይፋ ጀምሯል፡፡

የክልሉ የመንግስት ዋና ተጠሪ አብርሀም ማርሻሎ በወቅት እንደተናገሩት፤ በክልሉ ከተማና ገጠር እየተተገበረ ያለው የሌማት ትሩፋት መርሀ ግብር የምግብ ዋስትናን ለማረጋገጥና ገቢን ለማሳደግ እያገዘ ነው።

በተለይም የዶሮ እርባታ በትንሽ ቦታ በማካሄድ የሕብረተሰቡን ተጠቃሚነት ማሳደግ እንደተቻለ አንስተው ለስራው ስኬትም ክልሉ የአንድ ቀን ጫጩት አቅርቦትን የማሳደግ ሥራ እየሰራ ነው ብለዋል፡፡

 

ለዚሁ ስራ የአዳሬ ዶሮ እርባታ ኢንተርፕራይዝ የአንድ ቀን ጫጩት እንዲያቀርብ መደረጉንም አስረድተዋል፡፡

በኢንተርፕራይዙ ብቻ ዘንድሮ 1 ነጥብ 5 ሚሊዮን ጫጩቶችን ለማሰራጨት እየተገበረ መሆኑን ጠቁመው፤ የመኖ አቅርቦት እጥረትን ለመፍታትም በሁሉም ወረዳዎች የእንስሳት መኖ ማቀነባበሪያ እንዲኖር እየተሰራ መሆኑን ተናግረዋል፡፡

የክልሉ እንስሳት ሀብት ልማት ቢሮ ኃላፊ አሰፋ ፎና፤ በበጀት ዓመቱ 16 ሚሊየን የአንድ ቀን ጫጩቶችን ለማሰራጨት ታቅዶ እየተሰራ መሆኑን ገልጸዋል፡፡

 

ከዚህ በፊት የአንድ ቀን ጫጩት ከተለያዩ አካባቢዎች በማስመጣት ይሰራጭ የነበረውን በመተካት ኢንተርፕራይዙ በቅርበት በአማራጭነት እንዲያግዝ መደረጉን ጠቅሰዋል፡፡

የአዳሬ ዶሮ እርባታ ኢንተርፕራይዝ ዋና ሥራ አስኪያጅ ግዛቸው ታደሰ፤ የአንድ ቀን ጫጩት አዘጋጅተው በስፋት እያቀረቡ መሆኑን ተናግረዋል፡፡

 

ኢንተርፕራይዙ በሙሉ አቅሙ ወደ ሥራ ሲገባ በአንድ ዙር 174 ሺህ እንቁላል የማስፈልፈል አቅም እንዳለውም አብራርተዋል።

የአንድ ቀን ጫጩቶችን በመውሰድ አሳድገው የ48 ቀን ዶሮዎችን ለተጠቃሚዎች እንደሚያቀርቡ የገለጹት በሀዋሳ ዙሪያ ወረዳ የጋሎ ዎራንቾ ሁለገብ ህብረት ሥራ ማህበር ሥራ አስኪያጅ ሳሙኤል ሰርሚሶ ናቸው።

 

በዓመት 400 ሺህ የሚጠጋ ጫጩት ከሌላ አካባቢ አምጥተው በማሳደግ እንደሚያከፋፍሉ አውስተው፤ በአቅራቢያቸው የአንድ ቀን ጫጩት ማግኘት መቻላቸው ተጠቃሚነታቸውን እንደሚያሳድግ ተናግረዋል።

አዳሬ የዶሮ እርባታ ኢንተርፕራይዝ በሲዳማ ክልል በመንግስት የተቋቋመ የልማት ድርጅት ሲሆን፤ በክልሉ ብቸኛው የአንድ ቀን ጫጩት አቅራቢ መሆኑ ተመልክቷል።