‎በአማራ ክልል የበጎ ፈቃድ አገልግሎት የመረዳዳት ባህልን እያሳደገ ነው

ባሀርዳር ፤ ሕዳር 20/2018 (ኢዜአ)፡- በአማራ ክልል  የበጎ ፈቃድ አገልግሎት  የመረዳዳት  ባህልን  እያሳደገው መሆኑን የክልሉ ሴቶች፣ ወጣቶችና ማህበራዊ ጉዳይ ቢሮ አስታወቀ።

 "በጎነት ለኢትዮጵያ ከፍታ" በሚል መሪ ሃሳብ የክረምት በጎ ፈቃድ አገልግሎት ማጠናቀቂያና የበጋ ወራት ይፋዊ ማስጀመሪያ መርሃ ግብር በባህርዳር ከተማ ተካሂዷል።

‎የቢሮው ምክትል ኃላፊ አቶ ዘላለም አረጋ በመድረኩ እንደገለፁት፤  የበጎ ፈቃድ አገልግሎት የክልሉ  ነባር  የመረዳዳት ባህልን  መሰረት አድርጎ በመተግበር በርካታ  ዜጎችን ተጠቃሚ ማድረግ አስችሏል።

‎ለአብነትም ‎በክረምቱ ወራት የተከናወነው የበጎ ፈቃድ አገልግሎት ከ13 ነጥብ 8 ሚሊዮን በላይ የህብረተሰብ ክፍሎችን ተጠቃሚ ያደረጉ የተለያዩ የልማት ስራዎች  መከናወናቸውን ገልፀዋል።

‎‎ከተከናወኑ ተግባራት መካከል በትምህርት፣ በጤና፣ በድጋፍና እንክብካቤ፣ በሰላምና ፀጥታ፣ በከተማና በገጠር የኮሪደር ልማት፣ በአረንጓዴ አሻራ ችግኝ ተከላና ሌሎች  ይገኙበታል ብለዋል።

‎‎እንዲሁም ከ18 ሺህ በላይ የአቅመ ደካማ መኖሪያ ቤቶችን በአዲስ የመገንባትና የመጠገን ተግባር በውጤታማነት ማከናወን መቻሉን አስገንዝበዋል። 

‎‎በዘርፉ እየተገኘ ያለውን ውጤት አጠናክሮ ለማስቀጠልም በያዝነው በጋ ወራት ከ5 ሚሊዮን በላይ በጎ ፈቃደኞችን በማሳተፍ የበጎ ፈቃድ አገልግሎት ስራ ተጠናክሮ ቀጥሏል ብለዋል።

በሚከናወኑ የማህበራዊና ኢኮኖሚያዊ የልማት ተግባራት ከ11 ሚሊዮን በላይ ዜጎችን ተጠቃሚ ለማድረግ ታቅዶ ወደ ተግባር መገባቱን አስታውቀዋል።

‎‎በብልጽግና ፓርቲ የአማራ ክልል ቅርንጫፍ ጽህፈት ቤት የዲሞክራሲ ባህል ግንባታ ዘርፍ ኃላፊ መስፍን አበጀ (ዶ/ር) እንዳሉት፤ በክልሉ  የበጎ ፈቃድ አገልግሎት ተጨባጭ ውጤት እያስገኘ ነው።

‎‎በዚህም የህዝቡን ሁለንተናዊ ችግር የቀረፉ በርካታ የልማት ተግባራት በክረምቱ ወራት መከናወናቸውን ተናግረዋል።

 

‎በቅንጅት መስራት ከተቻለ ውጤት እንደሚገኝ በበጎ ፈቃድ አገልግሎት አረጋግጠናል ያሉት ዶ/ር መስፍን ይህ ተግባር በበጋው ወቅትም ተጠናክሮ እንደሚቀጥል  አስረድተዋል።

‎‎የአማራ ክልል ምክር ቤት የሴቶች፣ ህፃናት፣ ወጣቶችና ማህበራዊ ጉዳይ ቋሚ ኮሚቴ ሰብሳቢ ወይዘሮ አበራሽ ታደሰ በበኩላቸው፤ የበጎ ፈቃድ አገልግሎት ህብረተሰቡን ተጠቃሚ እያደረገ መሆኑን ገልጸዋል።

‎‎በያዝነው የበጋ ወራትም ተግባሩን በቅንጅት በመቀጠል የተቸገሩ ወገኖችን ተጠቃሚ የሚያደርጉ የበጎ ፈቃድ አገልግሎት ተግባራት ውጤታማ በሆነ አግባብ ሊከናወኑ እንደሚገባም አስገንዝበዋል።

‎‎በመድረኩም በክረምት ወራት የበጎ ፈቃድ ማጠቃለያና የበጋ ወራት ማስጀመሪያ መርሃ ግብር የተሻለ ለፈፀሙ ተቋማትና ግለሰቦች ዕውቅና ተሰጥቷል።