በክልሉ የፅንፈኛውን ቡድን የጥፋት ተልዕኮ በማምከን የሕዝቡን ተጠቃሚነት ማረጋገጥ የሚያስችሉ ተግባራት እየተከናወኑ ነው

ባህር ዳር፤ ህዳር 20/2018(ኢዜአ)፦ በአማራ ክልል የፅንፈኛውን ቡድን የጥፋት ተልዕኮ በማምከንና የሕግ የበላይነትን በማስከበር የሕዝቡን ተጠቃሚነት ማረጋገጥ የሚያስችሉ ተግባራት እየተከናወኑ መሆኑን የክልሉ ሰላምና ፀጥታ ቢሮ ሀላፊ እሸቱ የሱፍ(ዶ/ር) ገለጹ።

የቢሮው የ5 ዓመት ስትራቴጂክና የ2018 በጀት ዓመት ዕቅድ ላይ ያተኮረ መድረክ በባህር ዳር ከተማ እየተካሄደ ነው።

በመድረኩ የቢሮ ሀላፊው እሸቱ የሱፍ(ዶ/ር) እንዳመለከቱት፤ ጽንፈኛ ቡድኑ የታሪካዊ ጠላቶችን የጥፋት ተልዕኮ በመቀበል ህፃናትን ከትምህርት ገበታ የመነጠል፣ አርሶ አደሩ የግብርና ግብዓት በወቅቱ እንዳይደርሰው በማድረግና ሌሎች በደሎችን በማድረስ የሕዝብ ጠላትነቱን በተግባር አረጋግጧል።

 

የቡድኑን አጥፊነት ሕዝቡ ተረድቶ ከሕግ አስከባሪዎች ጋር በመተባበር አምርሮ እየታገለው መሆኑን ተናግረዋል።

ቡድኑ በመበታተን ላይ መሆኑን አንስተው፤ በሕግ ማስከበር እርምጃው የጥፋት ተልዕኮን በማምከን የሕዝቡን ተጠቃሚነት ማረጋገጥ የሚያስችሉ ተግባራት በመከናወን ላይ እንደሚገኙ ገልጸዋል።

መንግስት ያቀረበውን የሰላም አማራጭ በመጠቀም በርካታ የቀድሞ ታጣቂዎች በየቀኑ ወደ ሰላማዊ ኑሮ እየገቡ መሆኑንም ተናግረዋል።

አሁንም የቀሩት የቀረበላቸውን የሰላም አማራጭ ዕድል መጠቀም እንደሚችሉ ጠቅሰው፤ ሆኖም በባንዳነት በመንቀሳቀስ በጥፋት ድርጊቱ ለመቀጠል የሚሞክር ካለ የሕግ የበላይነትን ለማረጋገጥ የሚወሰደው እርምጃ ተጠናክሮ ይቀጥላል ብለዋል።

 

በክልሉ ሰላምን በዘላቂነት ለማፅናት ሕብረተሰቡ ፅንፈኞችን በማጋለጥ እያደረገ ያለውን ሁሉን አቀፍ ጥረት የበለጠ አጠናክሮ እንዲቀጥልም መልዕክት አስተላልፈዋል።

በምክትል ርዕሰ መስተዳድር ማዕረግ የአስተዳደር ክላስተር አስተባባሪ አማኑኤል ፈረደ(ዶ/ር) በበኩላቸው፤ የክልሉን ሰላም ለማፅናት በተወሰደው ጠንካራ የሕግ ማስከበር እርምጃ የባዳዎችና የባንዳዎችን እኩይ ዓላማ ማክሸፍ መቻሉን ተናግረዋል።

 

በተገኘው ሰላም የሕዝቡን የልማት ተጠቃሚነት ለማረጋገጥ ዘርፈ ብዙ ስራዎች እየተከናወኑ መሆኑን አንስተው፤ የክልሉ መንግስት የፀጥታ መዋቅሩን መልሶ በማደራጀት ውጤታማ ስራዎች ማከናወን ችሏል ብለዋል።

መንግስት ያስቀመጣቸውን ሁለንተናዊ የልማትና የመልካም አስተዳደር ግቦች ለማሳካት የሕዝቡን ሰላምና ደህንነት በዘላቂነት ማስጠበቅ አጽንኦት የተሰጠው ጉዳይ መሆኑንም ተናግረዋል።

በክልሉ የፀጥታ ስራዎችን በብቃት በመፈፀም እየተከናወኑ የሚገኙ የልማትና የመልካም አስተዳደር ስራዎች በተሻለ ፍጥነትና ጥራት ተጠናክረው እንዲቀጥሉ ትኩረት መሰጠቱን ገልጸዋል።

በመድረኩ በየደረጃው የሚገኙ የፀጥታ ዘርፍ አመራሮች እየተሳተፉ ይገኛሉ።