በዞኑ ሁሉም ወረዳዎች የስፖርት ማዘውተሪያ ማዕከላትን ተደራሽ ለማድረግ እየተሰራ ነው

አምቦ፤ ሕዳር 20/2018 (ኢዜአ)፡--በምዕራብ ሸዋ ዞን ሁሉም ወረዳዎች የስፖርት ማዘውተሪያ እና የወጣቶች ማዕከላትን ተደራሽ ለማድረግ መታቀዱን የዞኑ አስተዳደር አስታወቀ።

የዞኑ ስፖርት ምክር ቤት 23ኛ መደበኛ ጉባኤ ''ስፖርት ለልማትና ለሀገር ማንሰራራት ወሳኝ ነው'' በሚል መሪ ሀሳብ ተካሄዷል።

 

በዚሁ ጊዜ የምዕራብ ሸዋ ዞን ዋና አስተዳዳሪ እና የምክር ቤቱ ሰብሳቢ አቶ ዲዳ ጉደታ እንዳሉት፤ በዞኑ ወጣቱ ትውልድ የስፖርት ማዘውተሪያ ስፍራዎችን እንዲያገኝ ህብረተሰቡን ያሳተፈ ሥራ እየተሰራ ነው።

በተለይም በበጀት ዓመቱ በዞኑ በሚገኙ በሁሉም ወረዳዎች በቀበሌ ደረጃ የስፖርት ማዘውተሪያ ስፍራ ለመገንባት ታቅዶ ሥራዎች መጀመራቸውን ገልጸዋል።

 

ለስፖርት ማዘውተሪያ ስፍራው ግንባታ በቀበሌ ደረጃ አንድ ሄክታር መሬት እየተዘጋጀ መሆኑን ገልጸው ማዘውተሪያ ስፍራው ለሁሉም የስፖርት አይነቶች በሚሆን መልኩ ይገነባል ብለዋል።

ይህ እንቅስቃሴ ወደፊት አገርን መወከል የሚችሉ ተተኪ ስፖርተኞችን ለማፍራት የሚያግዝ መሆኑንም ጠቅሰዋል።

እቅዱን ለማሳካትም ከህዝብ ተሳትፎ ባሻገር የባለሀብቶችና የትምህርት ቤቶች ተሳትፎ መጠናከር እንዳለበትም አውስተዋል።

የዞኑ ወጣቶችና ስፖርት ጽህፈት ቤት ኃላፊ እና የስፖርት ምክር ቤቱ ጸሐፊ አቶ ምስጋና ከበደ በበኩላቸው፤  ስፖርት ጤናማና አምራች ዜጋን ለማፍራት ያለው ፋይዳ ከፍተኛ በመሆኑ ዘርፉን ለማጠናከር ትኩረት ተደርጓል ብለዋል።

 

በዞኑ ሁሉም አካባቢዎች የተጀመሩ የስፖርት መሰረተ ልማት ግንባታ ስራዎች ተጠናቀው አገልግሎት እንዲሰጡ ርብርብ እንደሚደረግም አመልክተዋል።

በጉባኤው ላይ ከተሳተፉት መካከል አቶ ከበደ ሀይሉ እንዳሉት፤ የስፖርት ዘርፉን ለማሳደግ የተጀመሩ እንቅስቃሴዎች አበረታች ናቸው።

 

በቀጣይም በዞኑ የሚከናወኑ የስፖርት መሰረተ ልማት ዝርጋታ ስራዎች እንዲፋጠኑ የበኩላቸውን እንደሚወጡ አመልክተዋል።

ሌላው የጉባኤው ተሳታፊ አቶ አለሙ ዳማሳ፤ በዘርፉ የተገኙ ጠንካራ ጎኖችን ማስቀጠል እና ደካሞ ጎኖችን ማረም እንደሚገባ ተናግረዋል።

 

በጉባኤው ማጠቃለያ ላይ በጊንጪ ከተማ ለተመሰረተውና 'ሌንጮታ ጭልሞ' ለተባለ የእግር ኳስ ክለብ ማጠናከሪያ የሚውል 1 ሚሊዮን ብር በጀት ተመድቧል። ለዞኑ የስፖርት እድገት የተሻለ አበርክቶ ለነበራቸው አካላትም እውቅና ተሰጥቷል።