የበጎ ፈቃድ አገልግሎት ዘላቂ የኑሮ ማሻሻያ ሥራዎች ላይ በማተኮር እየተተገበረ ነው

ዲላ ፤ ሕዳር 20/2018 (ኢዜአ) ፡- በዲላ ከተማ የበጋ ወራት በጎ ፈቃድ አገልግሎት በዘላቂ ኑሮ ማሻሻያ ሥራዎች ላይ በማተኮር እየተተገበረ መሆኑን የከተማው አስተዳደር ወጣቶች ጉዳይና የበጎ ፈቃድ አገልግሎት ጽሕፈት ቤት ገለጸ።

ጽሕፈት ቤቱ ከጌዴኦ ዞን ቀይ መስቀል ማሕበር ጋር በመተባበር በከተማው ጎላ ቀበሌ የበጋ ወራት የበጎ ፈቃድ አገልግሎት የቤት ግንባታ አስጀምሯል።

 

በከተማው የበጋ ወራት የበጎ ፈቃድ አገልግሎት ከ69 ሺህ በላይ ሰዎችን  ተጠቃሚ ለማድረግ ታቅዶ ተግባራዊ እየተደረገ መሆኑን  የጽሕፈት ቤቱ ሃላፊ አቶ መላኩ አየለ ለኢዜአ ተናግረዋል።   

 

አገልግሎቱ የአቅመ ደካማ ወገኖች ቤት ግንባታ፣ የደም ልገሳ፣ ማዕድ ማጋራት፣ የወባ በሽታ መከላከል፣ የትምህርት ቤት ማስፋፊያ ግንባታን ጨምሮ በሌሎችም በዘላቂ ኑሮ ማሻሻያ ሥራዎች ላይ በማተኮር እየተተገበረ መሆኑን ተናግረዋል።

ቀደም ሲል ጀምሮ ሲተገበር  የቆየውና አሁንም ተጠናክሮ የቀጠለው  የበጎ ፈቃድ አገልግሎት  የመረዳዳትና የመደጋገፍ ባሕል እየጎለበተ እንዲመጣ ማድረጉን ገልጸዋል።

ዓለም አቀፉን የበጎ ፈቃድ ቀንን ምክንያት በማድረግ የተለያዩ የበጎ ፈቃድ አገልግሎት ተግባራት እያከናወኑ መሆኑን ያነሱት ደግሞ የጌዴኦ ዞን ቀይ መስቀል ማሕበር ስራ አስኪያጅ አቶ ወንድወሰን ዳካ ናቸው።

 

በበጋ ወራት ለሚከናወነው የበጎ ፈቃድ አገልግሎት ለቤት ግንባታ የሚሆን ከ1 ሚሊዮን ብር በላይ ግምት ያለው ግብዓት መሰብሰቡንና   የዛሬው የቤት ግንባታ መጀመርም የዚሁ አካል መሆኑን ጠቁመዋል።

በተጨማሪም ማሕበሩ በአካባቢ ጽዳት፣ በደም ልገሳና በአልባሳት ድጋፍ ላይ በመሳተፍ ማሕበራዊ ሃላፊነቱን እየተወጣ እንደሚገኝ ነው የተናገሩት።

ቤት ከሚገነባላቸው መካከል ወይዘሮ አልማዝ ተስፋዬ  በሰጡት አስተያየት፤  በቀን ሥራ የሚያገኙት ገቢ ከቤት ውስጥ ፍጆታ አልፎ ቤት ለመስራት እንዳላስቻላቸው ገልጸዋል።

 

ዛሬ በበጎ ፈቃደኞች ቤታቸው እየተገነባላቸው መሆኑ እንዳስደሰታቸውና ችግራቸውንም እንደሚፈታላቸው ተናግረዋል። 

ማዘጋጃ ቤቱ በሰጣቸው ቦታ ላይ በበጎ ፈቃደኞች አዲስ ቤት እየተገነባላቸው መሆኑ ትልቅ እፎይታ እንደሰጣቸው የገለጹት ደግሞ ወይዘሮ  ማሚቴ ጤኮ ናቸው።

ቤት ተከራይቶ መኖር ከአቅማቸው አንጻር ከባድ ሆኖባቸው ሲቸገሩ እንደቆዩ አውስተው፤ ማዘጋጃ ቤቱና በጎ ፈቃደኞቹ ላደረጉላቸው ድጋፍ  አመስግነዋል።