በሀገረ መንግስት ግንባታ ሂደት ውስጥ የሲቪል ማህበረሰብ ድርጅቶች አዎንታዊ ሚናቸውን ማጠናከር አለባቸው 

አዳማ፤ ህዳር 20/2018(ኢዜአ)፦ በሀገረ መንግስት ግንባታ ሂደት ውስጥ የሲቪል ማህበረሰብ ድርጅቶች አዎንታዊ ሚናቸውን ማጠናከር እንዳለባቸው የሰላም ሚኒስቴር አስገነዘበ።

የሲቪል ማህበረሰብ በሀገር መንግስት ግንባታ ላይ የሚጠበቅባቸውን ሚና በተሻለ መወጣት በሚያስላቸው ሁኔታ ላይ የመከረ መድረክ በአዳማ ከተማ ተካሄዷል።

 

የሰላም ሚኒስትር ዴኤታ ኬይረዲን ተዘራ (ዶ/ር) እንደገለፁት በሀገረ መንግስት ግንባታ ላይ ከባለድርሻ አካላት ጋር በትብብር እየተሰራ ነው።

በተለይ በሰላምና ሀገረ መንግሥት ግንባታ ዙሪያ መንግስታዊና መንግስታዊ ካልሆኑ የሲቪል ተቋማትና ድርጅቶች ጋር በቅርበት እየተሰራ መሆኑን ተናግረዋል።

ከዚህም ባለፈ ድርጅቶቹ በሰላም፣ በመቻቻልና አብሮነት እንዲሁም በጋራ እሴቶች ማጎልበት ላይ እየሰሩ መሆናቸውንና ይህንንም ማጠናከር እንዳለባቸው ገልጸዋል።

በተለይም የሀገርን ብሔራዊ ጥቅምን ማስጠበቅ፣ በጋራ እሴትና ሀገራዊ ማንነትን ማስረፅ ላይ በትኩረት እየሰሩ መሆኑን ጠቅሰው፣ ከከፍተኛ ትምህርት ተቋማት ጋርም የጋራ እሴትና አብሮነትን ማጎልበት በሚቻልበት ሁኔታዎች ላይ ሥራዎች እየተከናወኑ መሆኑን አመልከተዋል።

በቀጣይም የሲቪል ማህበረሰብ ድርጅቶች በሀገረ መንግስትና በሰላም ግንባታ ላይ የሚወጡትን አዎንታዊ ሚና እንዲያጠናክሩ አስገንዝበዋል።

 

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ሳምሶን ቢራቱ በበኩላቸው ሰላም ለሀገር ዘላቂ ልማትና ዕድገት ወሳኝ መሆኑን ተናግረዋል።

በመሆኑም የሲቪል ማህበረሰብ ድርጅቶች ሰላምን በማፅናት እና በአገረ መንግስት ግንባታ ሂደት ድርሻቸውን እየተወጡ ነው ብለዋል።

ለዚህም በህጋዊ መንገድ ተመዝግበው እየተንቀሳቀሱ ካሉ 5ሺህ የሲቪል ማህበረሰብ ድርጀቶች መካከል 300 የሚሆኑት በሰላም ጉዳይ ላይ እየሰሩ መሆኑን በማሳያነት ጠቅሰዋል።