ቀኑ የወል ትርክት ግንባታን ይበልጥ ለማጠናከር ምቹ ሁኔታ ፈጥሯል

ድሬዳዋ ፤ ሕዳር 20/2018 (ኢዜአ)፡- የብሔሮች ፣ ብሔረሰቦች እና ሕዝቦች ቀን በዓል መከበር የወል ትርክትን በመገንባት ሕብረ ብሔራዊ አንድነትን ይበልጥ ለማጠናከር  ምቹ ሁኔታ  መፍጠሩ ተገለጸ። 

የ20ኛው የብሔሮች ፣ ብሔረሰቦች እና ሕዝቦች ቀን በዓል ዛሬ በድሬዳዋ አስተዳደር ተከብሯል ።

 

በበዓሉ ላይ የድሬዳዋ አስተዳደር ምክር ቤት አፈ ጉባዔ  ወይዘሮ ፈትህያ አደን፤ በዓሉ  ብሔሮች፣ብሔረሰቦችና ሕዝቦች ሕብረ ብሔራዊ አንድነታቸውን ያፀኑበት እንደሆነ  አንስተዋል።

 

ዜጎች ጠንካራ ሀገረ መንግስት በመገንባት የበለፀገች ኢትዮጵያን  ዕውን ለማድረግ  እንዲተጉ ምቹ መደላደል  የተፈጠረበት መሆኑን ገልጸዋል።

በተለይ ባለፉት የለውጥ ዓመታት  በጠንካራ ሕብረ ብሔራዊ አንድነት  በገጠርና በከተማ  ዘርፈ ብዙ ውጤቶች መመዝገባቸውን ተናግረዋል። 

የድሬዳዋ አስተዳደር ከንቲባ ከድር ጁሃር በበኩላቸው ፤ የብሔሮች ፣ ብሔረሰቦች እና ሕዝቦች ቀን በዓል  መከበሩ  ሕብረ ብሔራዊ አንድነት ይበልጥ ለማጠናከር ምቹ ሁኔታ መፍጠሩን ገልጸዋል።

 

እንቅፋት የነበረውን ነጠላ ትርክት በማስቀረት የወል ትርክትን በመገንባት ተጨባጭ ውጤት ማምጣት መቻሉን ተናግረዋል ።

ዘንድሮ በድሬዳዋ ገጠርና ከተማ የተከበረው በዓሉ  የተጀመሩ ተስፋ ሰጪ ውጤቶችን በላቀ ደረጃ ለማሳደግ ይበልጥ መነሳሳት የተፈጠረበት መሆኑን ጠቅሰው፤ ሕብረተሰቡ ሕብረ ብሔራዊ አንድነቱን  አፅንቶ ለተሻለ ለውጥ  እያደረገ ያለውን  ተሳትፎ እንዲያጠናክር መልዕክት አስተላልፈዋል ።