የክልሉ መንግስት ሙዚየሞችን ጠብቆ በማልማትና  በመንከባከብ  ረገድ ውጤታማ ተግባራት አከናውኗል 

ሐረር ፤ ሕዳር 20/2018 (ኢዜአ)፡- የሐረሪ ክልል ከአጋር አካላት ጋር በመሆን ሙዚየሞችን ጠብቆ በማልማትና  በመንከባከብ  ረገድ ውጤታማ ተግባራት አከናውኗል ሲሉ የቱሪዝም ሚኒስትር ሰላማዊት ካሳ ተናገሩ።

የቱሪዝም ሚኒስትር  ሰላማዊት ካሳ  ከአምባሳደሮችና አለም አቀፍ ተቋማት ተወካዮች ጋር በመሆን በክልሉ የሚገኙ ሙዚየሞችን ጎብኝተዋል።

በጉብኝቱ መርሀ ግብሩ ከ40 በላይ የውጭ ሀገራት አምባሳደሮች እና አለምአቀፍ ተቋማት ተወካዮች ተገኝተዋል።

 

ሚኒስተሯት፤  በተደረገው ጉብኝት በክልሉ የሚገኙ አስደማሚ የመስህብ ስፍራዎችን በተለይ ደግሞ ለሐረር የተሰጣትን አስደናቂ ቅርሶችን ተመልክተናል ሲሉ በተለይ ለኢዜአ ተናግረዋል።

ከተመለከቷቸውም መካከል በተለይ ለዘመናት ተጠብቀው የቆየና  በሙዚየሞች የሚገኙ ጥንታዊና ታሪካዊ ቅርሶች፣ ሃይማኖታዊና ትልቅ ቦታ የሚሰጣቸውን ጽሁፎችና መጽሃፍት እንደሚገኙበት ጠቅሰዋል።

የክልሉ መንግስት ከአጋር አካላት ጋር በመሆን ሙዚየሞችን ጠብቆ በማልማትና  በመንከባከብ  ረገድ ውጤታማ ተግባራት አከናውኗል ብለዋል፡፡

በክልሉ የሚገኙ ሙዚየሞች አያያዛቸውና አቀራረባቸው አርአያነት ያለውና  ልምድ የሚወሰድበት ነው ያሉት ሚኒስትሯ፤  ሐረር ሕያው ሙዚየም እንድትባል ካስቻላት መካከል ባሕላዊ ቤቶች አንዱ መሆኑን ጠቅሰዋል።

 

እያንዳንዱ ቁሳቁሶች ትርጉምና መልዕክት ያላቸውና አስደናቂ መሆናቸውን  እንደተመለከቱም  ጠቁመዋል።

ይህም  ታሪካቸው ተጠብቆ ለመጪው ትውልድ እንዲቆይ የሚያስችል መሆኑን ተናግረው፤  ሌሎችም በክልሉ  የሚገኙ  ሙዚየሞችን እንዲጎበኙ ጥሪ አስተላልፈዋል።

ሚኒስትር መስሪያ ቤቱና በጉብኝቱ ላይ የተካፈሉ አካላትን በመያዝ  በተለይ ሙዚየሞችን ማበልጸግ ላይ የድጋፍ ስራ ይከናወናል ብለዋል።