በዞኖቹ የሰፈነው ሰላም ሕብረተሰቡ ወደ ልማት እንዲመለስ አስችሏል

ነቀምቴ፤ ሕዳር 20/2018 (ኢዜአ)፡- በኦሮሚያ ክልል ሶስት የወለጋ ዞኖች  የሰፈነው ሰላም ሕብረተሰቡ ፊቱን ወደ ልማት  በመመለስ   ውጤታማ ተግባራት እንዲያከናውን ያስቻለው መሆኑን የዞኖቹ አመራሮች አስታወቁ።

ከኢዜአ ጋር ቆይታ ያደረጉት የምዕራብ ወለጋ፣ የምስራቅ እና  ሆሮ ጉዱሩ ወለጋ ዞኖች አመራሮች በአካባቢው የሰፈነው ሰላም ለልማት ስራዎች ምቹ ሁኔታ ፈጥሯል ብለዋል።

የምዕራብ ወለጋ ዞን ምክትል አስተዳዳሪ አቶ ገመዳ ተፈራ፣ በዞኑ ሕብረተሰቡ ከፀጥታ አካላት ጋር ተቀናጅቶ በመስራቱ ሰላም መስፈኑን ገልጸዋል።

 

ቀደም ባሉት ዓመታት በዞኑ በነበረው የጸጥታ ችግር የልማት ስራዎችን ማከናወን አዳጋች እንደነበር ጠቅሰው ፤ በሰፈነው ሰላም  ሕዝቡ   ትኩረቱን የልማት ስራ ላይ አድርጓል ነው ያሉት።

የተፈጠረው ምቹ ሁኔታ መደበኛ የግብርና ልማት ስራዎችን በትኩረት ከማከናወን ባሻገር የተቋረጡ የመሰረተ ልማት ዝርጋታ ስራዎች ዳግም እንዲጀመሩ ማስቻሉን ተናግረዋል።

በተጨማሪም ዞኑ ለኢንቨስትመንት ያለውን ምቹ ሁኔታ በመጠቀም ባለሀብቶች የማዕድን ልማትን ጨምሮ በተለያዩ የልማት ስራዎች ላይ እየተሳተፉ መሆኑን ገልጸዋል።

በዞኑ የተጀመሩ ተስፋ ሰጪ የገጠር እና የከተማ ልማት ስራዎች የበለጠ እንዲጠናከሩ የተገኘውን ሰላም ዘላቂ ለማድረግ ርብርቡ ይቀጥላል ብለዋል።

የምስራቅ ወለጋ ዞን ምክትል አስተዳዳሪ አቶ ደሱ ለሚ በበኩላቸው፤  በዞኑ የነበረው ችግር ተወግዶ ሰላም ሰፍኗል ብለዋል።

 

የሰፈነው ሰላም ለልማት ስራዎች መፋጠን ምቹ ሁኔታ በመፍጠሩ ወጣቶችም የስራ እድል ተጠቃሚ ሆነው ራሳቸውን ለመለወጥ እየተጉ መሆኑን አንስተዋል።

በዞኑ ሕዝቡን በማሳተፍ ሰፋፊ የግብርና ልማት ስራዎች እየተከናወኑ መሆኑን ጠቅሰው ፤ የማዕድን ፣ የቱሪዝም መዳረሻ ልማት እና ሌሎች ስራዎች እየተከናወኑ ይገኛሉ ብለዋል።

የዞኑ ሕዝብ ከፀጥታ አካላት ጋር በመተባበር የጀመረውን ዘላቂ ሰላም የማስፈን ስራ አጠናክሮ መቀጠሉን ተናግረዋል።

የሆሮ ጉዱሩ ወለጋ ዞን አሙሩ ወረዳ አስተዳዳሪ አቶ ደረጄ ወርቁ፣ በወረዳው ሰላም በመስፈኑ ሕብረተሰቡ የልማት ስራውን በሙሉ አቅሙ እያከናወነ ይገኛል ብለዋል።

 

በወረዳው እየተከናወኑ የሚገኙ የልማት ስራዎችም ተስፋ ሰጪ መሆናቸውን አመልክተው፤ የመሰረተ ልማት ግንባታ ስራም እየተከናወነ መሆኑን አንስተዋል።

የሰላም መንገድን የመረጡ የቀድሞ ታጣቂዎችም የተሃድሶ ስልጠና ወስደው በተለያዩ የልማት ስራዎች እየተሳተፉ መሆኑን ገልጸዋል።