የወልቂጤ ኮሪደር ልማት ከተማዋን ለእንቅስቃሴ፣ ለኑሮና ልሥራ ምቹ አድርጓታል-ነዋሪዎች

ወልቂጤ፤  ህዳር 20/2018 (ኢዜአ)፦ በወልቂጤ ከተማ እየተከናወነ ያለው የኮሪደር ልማት ከተማዋን ለተሽከርካሪ እንቅስቃሴ፣ ለኑሮና ለሥራ ምቹ ማድረጉን ነዋሪዎች ተናገሩ።
 

ለኢዜአ አስተያየታቸውን ከሰጡት መካከል በከተማዋ በትምህርትና በሥራ ለብዙ ጊዜ መኖራቸውን የተናገሩት የቸሃ ወረዳ ነዋሪ ወይዘሮ ወርቅታዊ ገብሬ ቀደም ሲል ከተማዋ ለእንቅስቃሴ ምቹ እንዳልሆነችና ማራኪ ገጽታ እንዳልነበራት አስታውሰዋል።

የኮሪደር ልማቱ ሁሉንም የህብረተሰብ ክፍል ታሳቢ በማድረግ ለሰውና ለተሽከርካሪ እንቅስቃሴ ምቹ ተደርጎ ከመሰራቱ ባለፈ መንገድ ዳር ያሉ ንግድ ቤቶች በተሻለ ሁኔታ ተገንብተው በማየታቸው ደስተኛ መሆናቸውን ገልጸዋል።

ልማቱ በአጭር ጊዜ ውስጥ ከተማዋ የነበራትን ገጽታ በመቀየር ለኑሮ ምች እንድትሆን ማድረጉን የተናገሩት ደግሞ የከተማዋ ዋሪ አቶ ሂዳያ ሙህዲን ናቸው። 

ወልቂጤ ከተማ የዕድሜዋን ያህል ሳትለማ በመቆየቷ ለዘመናት ሲቆጩ እንደነበር አስታውሰው፣ የኮሪደር ልማቱ ወልቂጤን ጽዱና ለዓይን ማራኪ እንድትሆን አድርጓታል ብለዋል።

እንደ አቶ ሂዳያ ገለጻ፣ በከተማዋ እየተከናወነ ያለው የኮሪደር ልማት ለዜጎች የሥራ ዕድል ከመፍጠር ባለፈ በአንዳንድ የከተማዋ አካባቢዎች ሲታይ የነበረ የቆሻሻም እንዲወገድ አድርጓል።

የቆሻሻ አወጋገድ ባህልን በመቀየር ህብረተሰቡ ለከተማው አድገትና ውበት ይበልጥ ተቆርቋሪ እንዲሆን ተነሳሽነት መፍጠሩንም ጠቁመዋል።

የእኖር ኤነር መገር ወረዳ ነዋሪ ወይዘሮ አሰለፈች ገብሬ እንዳሉት የኮሪደር ልማቱን ተከትሎ በዋና ዋና መንገዶች የሚገኙ ሱቆች ደረጃቸውን ጠብቀው እንዲገነቡ መደረጉን ለንግድ እንቅስቃሴ ምቹ ሁኔታ ፈጥሯል።

በከተማዋ የሚገኙ አደባባዮችና በመንገድ ዳርቻ ያሉ አረንጓዴ ስፍራዎች ለእይታ ሳቢ በሆነ መንገድ በመገንባታቸው ለመዝናኛነት ተመራጭ እየሆኑ መምጣታቸውንም ተናግረዋል።

የወልቂጤ ከተማ አስተዳደር ከንቲባ ሙራድ ከድር በበኩላቸው የተከናወነው የኮሪደር ልማት የከተማዋን ውበት ይበልጥ ለማጉላት፣ የትራፊክ እንቅስቃሴን ለማቀላጠግና ከተማዋን ለኑሮ ምቹ ለማድረግ አስተዋጾ አድርጓል።

በመጀመሪያ ዙር የኮሪደር ልማት በተለያዩ የከተማዋ አካባቢዎች 17 ነጥብ 5 ኪሎ ሜትር ለማከናወን ታቅዶ እስካሁን ድረስ 9 ነጥብ 6 ኪሎ ሜትሩ ተገንብቶ መጠናቀቁን ገልጸዋል።

ቀሪውን በአጭር ጊዜ ውስጥ አጠናቆ ለአገልግሎት ለማብቃት እየተሰራ መሆኑን ጠቁመው፣ የኮሪደር ልማቱ የእግረኛ፣ የተሽከርካሪ፣ የብስክሌት መንገዶችን እንዲሁም አረንጓዴ ስፍራዎችን አካቶ እየተከናወነ መሆኑን አስረድተዋል።

ልማቱ ወልቂጤ ከተማን ለኑሮ፣ ለቱሪዝምና ለኢንቨስትመንት ተመራጭ እያደረጋት መምጣቱንም ከንቲባ ሙራድ ተናግረዋል፡፡