የብሄር፣ ብሄረሰቦችና ህዝቦችን ቀን መከበሩ ለዴሞክራሲያዊ ስርዓት ግንባታ መጠናከር ትልቅ አስተዋጽኦ እያበረከተ ነው

አዳማ፤ ህዳር 20/2018(ኢዜአ)፦ የብሄር፣ ብሄረሰቦችና ህዝቦችን ቀን መከበሩ ለዴሞክራሲያዊ ስርዓት ግንባታ መጠናከር ትልቅ አስተዋጽኦ እያበረከተ መሆኑ ተገለጸ።

20ኛው የብሄር ብሄረሰቦችና ህዝቦች ቀን "ዴሞክራሲያዊ መግባባት ለህብረ ብሄራዊ አንድነት" በሚል መሪ ሀሳብ በአዳማ ከተማ አስተዳደር በፓናል ውይይት ተከብሯል።

በዚህ ወቅት የአዳማ ከተማ አስተዳደር ምክር ቤት አፈ ጉባዔ እመቤት ጅባ የብሄር፣ ብሄረሰቦችና ህዝቦች ቀን መከበር የብልጽግና ጉዞን ለማስቀጠል መደላድል ይፈጥራል።

የብሄር፣ ብሄረሰቦችና ህዝቦች ቀን መከበሩ ለዴሞክራሲያዊ ስርዓት ግንባታ መጠናከርም ትልቅ አስተዋጽኦ እያበረከተ መሆኑንም ገልጸዋል።

ዕለቱን አስመልክቶ የውይይት መነሻ ሰነድ ያቀረቡት በብልጽግና ፓርቲ የአዳማ ቅርንጫፍ ጽህፈት ቤት ኃላፊ አሸናፊ አጀማ በበኩላቸው የለውጡ መንግሥት የብሄር ብሄረሰቦችና ህዝቦች መብት በእኩልነት ጽኑ መሠረት ላይ እንዲቆም ማድረጉን  አስገንዝበዋል። 

የፌዴራል ሥርዓትን ለማጠናከርና ዘላቂ ሀገረ መንግሥት ለመገንባት ብዝሃነትን ማክበርና እኩልነትን ማረጋገጥ ላይ እየሰራ መሆኑን ገልፀዋል፡፡

በዚህ ረገድ ባለፋት ዓመታት በሀገሪቱ የፌዴራል ሥርዓት አተገባበር ላይ ያጋጠሙ ክፍተቶች በመሙላትና የተገኙ መልካም ተሞክሮዎችን ለማስቀጠል መንግሥት አበክሮ እየሰራ መሆኑን አስታውቀዋል።

ለልማት፣ ለሠላምና ለአንድነት እንዲሁም ለህብረ-ብሔራዊ ሥርዓት ግንባታ እንቅፋቶችን ለመፍታት በሚደረገው ጥረት የሁሉም የህብረተሰብ ክፍል በጋራ ሊሰራ እንደሚገባ አስገንዝበዋል።

‎ከበአሉ ታዳሚዎች መካከል ወይዘሮ ብርሃኔ ድሪባ ለኢዜአ በሰጡት አስተያየት የበዓሉ መከበር የብሄር፣ ብሄረሰቦች  ህዝቦችን አብሮነት ማጠናከሩን ጠቁመዋል።

ሀገራዊ መግባባት እንዲፈጠርና ህብረ ብሄራዊነት እንዲጠናከር ከፍተኛ ሚና እንዳለው የገለጹት ደግሞ ሌላኛው የበዓሉ ታዳሚ ደግፌ ታዬ ናቸው።

ለዴሞክራሲያዊ ስርአት ግንባታ መሰረት መጣሉን ያነሱት አስተያየት ሰጪው ስኬቱን ጠብቀን ለተጨማሪ ድል  ከመንግሥት ጎን መሰለፍ የዜግነት ግዴታችን ነው ብለዋል።

‎በበዓሉ አከባበር ላይ የከተማ አስተዳደሩ አመራሮች፣ የከተማዋ ነዋሪዎች፣ የወጣትና የሴቶች አደረጃጀቶች፣ የሀኃይማኖት አባቶችና የሀገር ሽማግሌዎች ታድመዋል።