በኢሉአባቡር  ዞን  ከ17 ሺህ ሔክታር በላይ መሬት  በተለያዩ ቅመማ ቅመሞች እየለማ ነው

መቱ ፤ ሕዳር 20/2018 (ኢዜአ)፡-በኢሉአባቦር ዞን በተለያዩ ቅመማ ቅመሞች ከ17 ሺህ ሔክታር በላይ መሬት መልማቱን የዞኑ ግብርና ጽሕፈት ቤት ገለጸ።

ኢሉአባቦር ዞን  ግብርና ጽሕፈት ቤት  ኃላፊ አቶ ቻላቸው አዱኛ፣ በዞኑ በተለያዩ የቅመማ ቅመም እየለማ ካለው ከ17 ሺህ ሔክታር በላይ መሬት ከ800 ሺህ ኩንታል በላይ ምርት  ለመሰብሰብ ወደ ስራ  መገባቱን ተናግረዋል።

 

ዞኑ ለግብርና ልማት ያለውን አቅም ወደ ውጤት በመቀየር  የአርሶ አደሩን  ተጠቃሚነት ለማሳደግ  ግብአትና ምርጥ ዘር ማቅረቡን ተናግረዋል።

ዞኑ በተለይም  የቅመማቅመም ልማት ያለውን አመቺነት  በመጠቀም አርሶ አደሮች  ኮረሪማ፣ በርበሬ፣ ዝንጅብልና እርድ በማምረት ኢኮኖሚያዊ አቅማቸውን እንዲያሳድጉ ድጋፍና ክትትል መደረጉን  አንሰተዋል።

በቅመማ ቅመም ከተሰማሩ አርሶ አደሮች መካከል  በመቱ ወረዳ የቡሩሳ ቀበሌ ነዋሪ  አቶ ጀማል ኡስማን  እንዳሉት፤ ባላቸው ትንሽ መሬት ኮረሪማ ማልማት ከጀመሩት በጥቂት ዓመታት ወዲህ ኢኮኖሚያዊ ተጠቃሚነታቸው እያደገ ነው።

 

የኮረሪማ ምርቱ ውጤታማ መሆኑንና ልማታቸውን በማስፋት  አሁን ላይ ወደ ግማሽ ሔክታር መሬት  ማስፋፋታቸውን ገልጸዋል።

ባለፈው ዓመት ከልማቱ ከ100 ሺህ ብር በላይ ገቢ ማግኘት በመቻላቸው ስራውን በማስፋት በዘንድሮው የምርት ዘመንም  ከ300 ሺህ ብር በላይ  ለማግኘት ጠንክረው እየሰሩ መሆናቸውን አክለዋል።

በዞኑ የቡሬ ወረዳ ነዋሪ  አቶ በፈቃዱ አብዲሳ  በበኩላቸው፤ ባለፈው ዓመት ካመረቱት ግማሽ ሔክታር ማሳ በርበሬ ልማት  ከ100 ሺህ ብር በላይ ማግኘታቸውን አስታውሰዋል።

ከልማቱ ተጠቃሚነታቸውን ለማሳደግም ስራውን በይበልጥ አስፍተው እንዲሰሩ ተነሳሽነትን እንደፈጠረላቸው  ተናግረዋል።

 

አቶ ዑስማን ታፈሰ በበኩላቸው፤ በበርበሬ ግብርና ስራ የብዙ ወጣቶችና የአካባቢው ነዋሪዎች ሕይወት እየተቀየረ መሆኑን በማንሳት ይህም ለስራው ትኩረት እንዲሰጡ እንዳደረጋቸው ተናግረዋል።

ከባለፈው ዓመት የበርበሬ ስራቸውም ወደ 200 ሺህ ብር የሚጠጋ ገቢ ማግኘታቸውን ገልፀዋል።

በበርበሬ እርሻው ውጤታማ በመሆናቸው ስራውን አስፋፍተው እየሰሩ መሆኑንም ተናግረዋል።