ማንችስተር ሲቲ ከሊድስ ዩናይትድ ጋር ይጫወታል  

አዲስ አበባ፤ ሕዳር 20/2018(ኢዜአ)፦ የእንግሊዝ ፕሪሚየር ሊግ 13ኛ ሳምንት መርሃ ግብር ዛሬ ይጀመራል።

በዕለቱ አምስት ጨዋታዎች ይደረጋሉ። ከምሽቱ 12 ሰዓት ማንችስተር ሲቲ ከሊድስ ዩናይትድ በኢትሃድ ስታዲየም ይጫወታሉ።

በሊጉ የደረጃ ሰንጠረዥ ማንችስተር ሲቲ በ22 ነጥብ ሶስተኛ ደረጃ ላይ ይገኛል። ሊድስ ዩናይትድ በ11 ነጥብ 18ኛ ደረጃን ይዞ ወራጅ ቀጠና ውስጥ ይገኛል። 

ማንችስተር ሲቲ በሊጉ ባደረጋቸው 12 ጨዋታዎች ሰባት ጊዜ ሲያሸንፍ አራት ጊዜ ሽንፈት አስተናግዷል። በቀሪ አንድ ጨዋታ አቻ ተለያይቷል። በጨዋታዎቹ ላይ 24 ግቦችን ሲያስቆጥር 10 ግቦችን አስተናግዷል። 

ተጋጣሚው ሊድስ ዩናይትድ ከ12 የሊጉ ጨዋታዎች መካከል በሶስቱ ሲያሸንፍ ሰባት ጊዜ ተሸንፏል። በሁለት ጨዋታዎች ደግሞ አቻ ተለያይቷል። 11 ጎሎችን ከመረብ ጋር ሲያገናኝ 22 ግቦች ተቆጥረውበታል።

ሁለቱ ቡድኖች በእንግሊዝ ፕሪሚየር ሊግ ሲገናኙ የአሁኑ ለ21ኛ ጊዜ ነው። ከዚህ ቀደም ባደረጓቸው 20 ጨዋታዎች ማንችስተር ሲቲ ስምንት ጊዜ ሲያሸንፍ ሊድስ ዩናይትድ ሰባት ጊዜ ድል ቀንቶታል። በአምስቱ ጨዋታዎች አቻ ተለያይቷል። 

 

ማንችስተር ሲቲ በ20ዎቹ ጨዋታዎች ላይ 32 ግቦችን ሲያስቆጥር ሊድስ ዩናይትድ 24 ጎሎችን ከመረብ ላይ አሳርፏል። 

ሁለቱ ክለቦች ለመጨረሻ ጊዜ በሊጉ የተገናኙት እ.አ.አ በ2023 ሲሆን በወቅቱ ባደረጉት ጨዋታ ማንችስተር ሲቲ 2 ለ 1 አሸንፏል።

በዛሬው ጨዋታ ማንችስተር ሲቲ ካሸነፈ ከሊጉ መሪ አርሰናል ጋር ያለውን የነጥብ ልዩነት ወደ አራት ዝቅ ያደርጋል። 

በአንጻሩ ሊድስ ዩናይትድ ከጨዋታው ሶስት ነጥብ ካገኘ ከወራጅ ቀጠና ይወጣል።

በሌሎች መርሃ ግብሮች ብሬንትፎርድ ከበርንሌይ እና ሰንደርላንድ ከቦርንማውዝ በተመሳሳይ ከምሽቱ 12 ሰዓት ላይ ይጫወታሉ።

ኤቨርተን ከኒውካስትል ዩናይትድ ከምሽቱ 2 ሰዓት ከ30 እና ቶተንሃም ሆትስፐርስ ከፉልሃም ምሽት አምስት ሰዓት ላይ ጨዋታቸውን ያደርጋሉ።