ቀጥታ፡

የሊጉ መሪ ኢትዮ ኤሌክትሪክ ከአርባምንጭ ከተማ ይጫወታል 

አዲስ አበባ፤ ሕዳር 20/2018 (ኢዜአ)፦ በኢትዮጵያ ሴቶች ፕሪሚየር ሊግ ዘጠነኛ  ሳምንት የሁለተኛ ቀን ውሎ ሁለት ጨዋታዎች በአበበ ቢቂላ መታሰቢያ ስታዲየም ይካሄዳሉ። 

ከቀኑ 7 ሰዓት ላይ አርባምንጭ ከተማ ከኢትዮ ኤሌክትሪክ ይጫወታሉ።

አርባምንጭ ከተማ  በሊጉ ካደረጋቸው ስምንት ጨዋታዎች ሁለት ጊዜ ሲያሸነፍ አምስት ጊዜ ሽንፈት አስተናግዷል። አንድ ጊዜ ደግሞ አቻ ወጥቷል። በጨዋታዎቹ ላይ ስድስት ግቦችን ሲያስቆጥር 14 ግቦችን አስተናግዷል። 

ቡድኑ በሰባት ነጥብ 11ኛ ደረጃን ይዟል። 

ተጋጣሚው ኢትዮ ኤሌክትሪክ በሊጉ ያደረጋቸውን ስምንት ጨዋታዎች አሸንፏል።

 22 ጎሎችን ከመረብ ላይ ሲያሳርፍ አምስት ግቦች ተቆጥረውበታል። ቡድኑ በ24 ነጥብ ሊጉን እየመራ ነው። 

ኢትዮ ኤሌክትሪክ ካሸነፈ የሊጉን መሪነት ያጠናክራል። 

በሌላኛው መርሃ ግብር ልደታ ክፍለ ከተማ ከሸገር ከተማ ከረፋዱ አራት ሰዓት ላይ ጨዋታቸውን ያደርጋሉ። 

ልደታ ክፍለ ከተማ በሊጉ ካከናወናቸው ስምንት ጨዋታዎች ያሸነፈው አንድ ጊዜ ብቻ ነው። አምስት ጊዜ ሲሸነፍ ሁለት ጊዜ አቻ ወጥቷል። ሰባት ግቦችን ከመረብ ጋር ሲያገናኝ 15 ጎሎችን አስተናግዷል።

ቡድኑ በአምስት ነጥብ 12ኛ ደረጃን ይዟል።

አዲስ አዳጊው ሸገር ከተማ በበኩሉ በውድድር ዓመቱ ሰባት ጨዋታዎችን አድርጎ አራት ጊዜ ሲያሸንፍ ሶስት ጊዜ ተሸንፏል።

በጨዋታዎቹ ላይ 11 ግቦች ሲያስቆጥር 10 ግቦችን አስተናግዷል። ቡድኑ በ12 ነጥብ አምስተኛ ደረጃ ላይ ተቀምጧል።

የኢትዮጵያ ዜና አገልግሎት
2015
ዓ.ም