Waldaan Warra Wangeela Makaanayasuus Dame Godina Baalee Harka Qalleeyyii Deeggare - ENA Afaan Oromoo
Waldaan Warra Wangeela Makaanayasuus Dame Godina Baalee Harka Qalleeyyii Deeggare
Finfinnee Caamsaa 22/2012(TOI)- Godina Baalee Magaalaa Roobeetti waldaan Warra Wangeelaa Makaanayesuus hawaasaa rakkataniif nyaataa fi meeshaalee qulqullinaa birrii kuma dhibba 3tti tilmaamamu deeggare.
Deeggarsi waldichaan taasifame saaxilamummaa dubartootaaf daa’imman harka qalleeyyii dhibee koroonaatiif qaban xiqqeessuu keessatti gummaacha olaanaa qabaa jedhe waajjirri Dhimma Dubartootaa, Daa’immanii fi Dargaggootaa Godina Balee.
Namoonni deeggarsi godhameef waldichi ilmaan isaanii barnoota tolaan barsiisuu,nyaataaf uffata isaanii tolaan arjoomuun cinaatti dhibee koronaa sababeeffachuun deeggarsa addaa isaaniif godheef galateeffatanii jiru.
Daareektarri piroojektii Waldaa Makaanayesuus Damee Roobee obboo Massalaa Kabbadaa waldaan isaanii hawaasa harka qalleeyyii magaalaa Roobee keessa jiran 226 ol tahan karaa idileen kafaltii barnootaaf baasii nyataaf uffata isaanii dandahuun barsiisaa turuu dubbatan.
Yeroo ammaa kanattis dhibee koronaa kana sababeeffachuun maatiin harka qalleeyyii 200 tahan rakkoof akka hin saaxilamneef deeggarsi daakuu, zayita nyaataaf meeshaalee qulqullina birrii kuma dhibba saditti tilmaamamu akka taasifame dubbatan.
Itti Gaafatamtuun waajjira Dhimma Dubartii,Dargaggootaaf Daa’imman Godina Baaleef miseensi taaksi foorsii ittisa konoraa Aaddee Fayyisee Alamuu gama isaaniitiin deeggarsi waldichaan taasifame saaxilamummaa dubartootaaf daa’imman harka qalleeyyii dhibee koroonaatiif qaban xiqqeessuu keessatti gummaacha ol’aana qaba jedhan.
Waldaan makkaneyesuus maatii harka qalleeyyii magaalaa Roobee tolaan barsiisuu cinaatti deeggarsi gara garaa namoota rakkataniif taasisaniif galateeffatanii, deeggarsi kun fuulduraafis cimee akka itti fufu aaddee Fayyiseen gaafataniiru.