በሙስናና ሌሎች ከባድ ወንጀሎች ምክንያት በቁጥጥር ስር ከዋሉ ግለሰቦች ውጭ ያሉ እስረኞች ጉዳይ ፈጣን እልባት እንዲያገኝ ጠቅላይ ሚኒስትሩ መመሪያ ሰጡ

376

አዲስ አበባ፤ የካቲት 10/2012(ኢዜአ) የዴሞክራሲ ምህዳሩን ለማስፋት ሲባል በሙስናና ሌሎች ከባድ ወንጀሎች ተይዘው የፍርድ ሂደታቸውን ከሚከታተሉ ግለሰቦች ውጭ ያሉ እስረኞች ጉዳይ ፈጣን እልባት እንዲያገኝ ጠቅላይ ሚኒስትር ዶክተር አብይ አህመድ መመሪያ ሰጡ።

ጠቅላይ ሚኒስትሩ ይህን ያሉት ዛሬ ከትግራይ ክልል ብልጽግና ፓርቲ አመራሮች ጋር በተወያዩበት ወቅት ነው።

የትግራይ ክልል ብልጽግና ፓርቲ ቅርንጫፍ አመራር አባል ዶክተር አብርሃም በላይ አመራሮቹን ወክለው ለጠቅላይ ሚኒስትሩ ጥያቄዎችን አቅርበዋል።

ዶክተር አብርሃም በዚህ ወቅት በተለያዩ ወንጀሎች እጃቸው እንዳለበት የተጠረጠሩ ግለሰቦች በህግ ጥላ ስር  መሆናቸውን አንስተዋል።

ከዚህ ጋር በተያያዘ በተለይ የትግራይ ተወላጆች ተለይተው እየተጠቁ እንደሆነ በስፋት እንደሚወራ ገልጸው፤ መንግስት በእስር ላይ ያሉ የትግራይ ተወላጆችን ጉዳይ እንደገና እንዲመለከተው ጠይቀዋል።

የፌዴራል መንግስት በተለየ መልኩ የትግራይ ክልልን በኢኮኖሚና ልማት አሻጥር ለማዳከም እየሰራ ነው የሚል ቅስቀሳ መኖሩን ጠቁመው፤ ጉዳዩን በሚለከት መንግስት ያለውን እውነት እንዲናገር ጠይቀዋል።

የትግራይ ህዝብ በፌዴራል መንግስትና በጎረቤት አገሮች ጥቃት ሊደርስበት እንደሆነ በማስመሰል የሚሰራጭ መረጃ መኖሩንም ተናግረዋል።

ይህም በትግራይ ህዝብ ላይ ከፍተኛ ውዥምብር ፈጥሯል ነው ያሉት።

በውይይቱ ላይ የተገኙትና ከአማራ ክልል ተወላጆች ይነሱ የነበሩ ጥያቄዎችን ያቀረቡት የጠቅላይ ሚኒስትሩ የፕሬስ ሴክሪታሪያት ኃላፊ አቶ ንጉሱ ጥላሁን በበኩላቸው ከለውጡ በኋላ አማራ ክልል ከተከሰቱ ግጭቶች ጋር ታያይዞ በህግ ጥላ ስር ያሉና ቀጥተኛ የወንጀል ግንኙነት የሌላቸው ግለሰቦች በተመሳሳይ መልኩ ጉዳያቸው እንዲታይ ጥያቄ አቅርበዋል።

ጠቅላይ ሚኒስትሩ በምላሻቸው የፌዴራል መንግስት በተለየ መልኩ ሊጠቅመው ወይም ሊጎዳው የሚፈልገው ክልል አለመኖሩን ተናግረዋል።

የትግራይ ክልልን ያገለለ ልማት ኢትዮጵያን እንደአገር ሊያበለጽጋት እንደማይችል ጠቁመው፤ ከዚህ አንጻር ትግራይ በተለየ መልኩ እየተጎዳች እንደሆነ ተደርጎ የሚወራው ስህተት ነው ብለዋል።

ከህግ ጥሰት ጋር በተያያዘ የተጠረጠሩ በየትኛውም የኢትዮጵያ ክልሎች የሚገኙ ዜጎች በቁጥጥር ስር መዋላቸውን ጠቁመዋል።

የትግራይ ተወላጆችም ከዚህ አንጻር ካልሆነ በተለየ መልኩ  ለእስር አለመዳረጋቸውን ነው ያነሱት።

ነገር ግን በየትኛውም የአገሪቱ አካባቢ በሙስናና ከባድ ወንጀሎች ተይዘው የፍርድ ሂደታቸውን ከሚከታተሉ ግለሰቦች ውጭ ያሉ እስረኞች የዴሞክራሲ ምህዳሩን ለማስፋት ሲባል ጉዳያቸው እንደገና ታይቶ እልባት እንዲያገኝ መመሪያ ሰጥተዋል።

የበጀት ቀመርን የሚያወጣውና የሚደለድለው የፌዴራል መንግስት ሳይሆን የፌዴሬሽን ምክር ቤት መሆኑን ነው ጠቅላይ ሚኒስትሩ የተናገሩት።

ከዚህ አንጻር ትግራይ በተያዘው በጀት ዓመት 8 ነጥብ 2 ቢሊዮን ብር ለቀጥተኛ በጀት፤ 400 ሚሊዮን ብር ደግሞ ለዘላቂ የልማት ግቦች የሚውል በጀት ተመድቦለታል ብለዋል።

በጀቱ በፌዴራል መንግስት የሚሰሩ ፕሮጀክቶችን እንደማያካትት ተናግረው፤ ለትግራይ ክልል በዘንድሮው ዓመት የተያዘው በጀት ከዚህ ቀደም ከነበሩት በእጅጉ እንደሚበልጥ ጠቅሰዋል።

የክልሉ ምክር ቤት በጀቱ ለተያዘለት ዓላማ ብቻ እንዲውል መቆጣጠር እንደሚገባውም ጠቅላይ ሚኒስትሩ አውስተዋል።

በትግራይ ክልል ላይ የሚቃጣ ማንኛውም ጥቃት የክልሉ ብቻ ሳይሆን የኢትዮጵያ ጉዳይ መሆኑን ገልጸው፤ ኢትዮጵያ በዚህ ደረጃ የሚያሰጋት ምንም አይነት የውጭ ጥቃት አለመኖሩን ተናግረዋል።

የፌዴራል መንግስት የትግራይ ክልልን የመጠበቅ ግዴታ እንጂ በተቃራኒው የማጥቃት ህጋዊ አግባብም ሆነ ፍላጎት እንደሌለውም ነው ያብራሩት።

በክልሉ የሚገኘውን የአገር መከላከያ ሰራዊት ይህን ተልዕኮ እየፈጸመ መሆኑን ለአብነት አንስተዋል።