”ቆሪጦችን የደፈሩ ቆራጦች”

335

ገብረህይወት ካህሳይ ከኢዜአ 

ቢሾፍቱ የስምንት ድንቅ ሐይቆች ባለቤት ናት ። ሐይቆቹ ግን የቅርብ ሩቅ ሆነው ሁሉም በሚገባ አያውቃቸውም ነበር ። በመጠኑ የሚያውቃቸውም ቢሆን ከመልካም ጎናቸው ይልቅ ከቆሪጥ ጋር በተያያዙ መጥፎ አፈ ታሪኮች ነበር ማለት ይቻላል ።

በተለይ አብዛኛውን ጊዜ ጥቁር ሰማያዊ ቀለም ያለው መስሎ በሚታየው ”ቢሾፍቱ” ሐይቅ ላይ ቆሪጥ አለ ሲባል ዘመን አስቆጥሯል ። ቆሪጡን አየሁት የሚል ግን ማግኘት አይታሰብም ። 

የቀድሞ ነገስታት ለቢሾፍቱ ቆሪጦች ይገብራሉ ተብለው ሲታሙ እንጂ ግብሩን ሲያቀርቡ በአካል አየሁ የሚልም አልተገኘም ። እንዲያውም ቅንድቡ የገጠመ ሰው እየተመረጠ ለቆሪጥ ግብር ይቀርባል እየተባለም ይወራ ነበር ። ይህ ደግሞ በተፈጥሮ ቅንድባቸው የገጠመ ውብ የሰው ልጆች የአሉባልታው ሰለባዎች ሆነው ለስነ ልቦናዊ ጉዳት የሚጋለጠበት ጊዜ ነበር ይባላል ። ከይባላል የዘለለ መረጃ ግን የለም ።

በአንዳንድ አካባቢዎች ጥሮ ግሮ ሀብት ያፈራና ከሌሎች ተወዳዳሪዎቹ ጋር ጎልቶ የሚታይ የንግድ ሰው ” ሰላቢ ” የሚል ተቀፅላ ስም ሲለጠፍበት ይሰማል ። ” ሰላቢ” ሆኖ ሀብት ለማግበስበስ ደግሞ ጠንቋይ ቤት መሄድ እንደሚያስፈልግ የሚያምኑ በርካቶች ናቸው ።

የመስለቢያ ችሎታ ይገኝባቸዋል ተብሎ ውስጥ ውስጡን ከሚነገርላቸው ቦታዎች መካከል ደግሞ አንዱ የቢሾፍቱ ቆሪጥ ያለበት ስፍራ እንደሆነ ተደርጎ ይነገራል ። የአሉባልታው አናፋሽ ሰዎች ሲያወሩ በትረካዊ ልባስ አሸባርቀው ስለሚያቀርቡት በየዋህነት አምኖ የሚቀበላቸው ሰው ቁጥሩ ቀላል ነው ማለት አይቻልም ።

” ሁለት አማራጮች ይቀርብልኃል ብለው ይጀምራሉ ። በቀኝ በኩል የሰማዩን በግራ በኩል ደግሞ የምድሩን ነው ይሉታል ። ለቆሪጡ ተገቢውን እጅ መንሻ ካቀረብክ በቀኝ በኩል የአባ ጨጓሬ መአት በግራ በኩል ደግሞ የብር ክምር አቅርቦ ያስመርጠኃል ። የብር ክምሩን ከመረጥክ በምድር ላይ ሃብታም ትሆንና በሰማይ የሚጠብቅህ አባጨጓሬው ነው ” እያሉ ይተርኩታል ።

የሰማዩን ሳያስፈራቸው ምድራዊ ሀብቱን የሚያሟልላቸው ግብዞች አለአግባብ ገንዘብ ለማግኘት ሲሉ መልሰው እራሳቸውን ሲሸወዱ የሚታይበት አጋጣሚም በርካታ ነው ። ከወደ አዳማ በአንድ ወቅት ያጋጠመ ታሪክ ለዚሁ ጥሩ ማሳያ ነው ።

ሶስት ጓደኛሞች ናቸው ። ፈጣሪ የሰጣቸው ሀብት ከራሳቸው አልፎ ለዘመድ አዝማድም መትረፍ ይችላል ። ተጨማሪ ሀብት አለአግባብ በማግበስበስ በአቋራጭ ለመንገስ ፈለጉና ቆሪጥን የሚያገኙበት መንገድ ማፈላለግ ጀመሩ ።

ይህንኑ ሚስጢራቸው አፈትልኮ ይወጣና የከተማው ጩሉሌዎች ዘንድ ይደርሳል ። ጩሉሌዎቹ ከሶስቱ ጓደኛሞች ጋር የሚቀራረብ ሰው ያፈላልጉና ስለ ቆሪጥ በደንብ አድረገው ይተሩኩለታል ። እሱም የተነገረውን አምኖ በመቀበል ለእነዚያ ሰዎች በደንብ አድርጎ ያካፍላቸዋል ።

የሚፈልጉትና የሚጠብቁት ሰው በቀላሉ መገኘቱንና በአቋራጭ ወደ ቆሪጥ ሊያደርሳቸው እንደሚችል በማመን በጥቂት ቀናት ውስጥ ተራኪውን ተዋወቁት ። ከቆሪጥ ጋር እንደሚተዋወቅ ፣ ፕሮግራም አስይዞ እንደሚያገነኛቸውና ለትውውቅ ፕሮግራሙ እጅ መንሻ 30 ሺህ ብር መስጠት እንደሚያስፈልግ በጥሩ ቃላት ከሽኖ በማቅረብ ከስምምነት ላይ ተደረሰ ። 

በሌላ ጊዜ ስልክ ደውሎ በገባው ቃል መሰረት ቀጠሮ እንዳስያዘላቸው ይገልፅና በነገታው ከምሽቱ ሁለት ሰዓት ጉዞ ወደ ቢሾፍቱ ሐይቅ እንደሚደረግ ያሳውቃቸዋል ። ጩሉሌው ሰዎችን በተጭበረበረ መንገድ ማሳመን የሚችልበት ወጥመድ አስቀድሞ ዘርግቷል ።

እንዳይደርስ የለም የተባለው ሰዓት ደረሰ ። በካሪና ኢ የቤት አውቶሞቢል ወደ ቢሾፍቱ ሐይቅ አመሩ ። ጨለማውን ተገን በማድረግ በእግራቸው ወደ ሐይቁ ተጠጉ ። ጩሉሌው ድምፁን ከፍ አድርጎ ” ጌታዬ ! በቀጠሮአችን መሰረት መጥተናል ” ሲል በሐይቁ በኩል የሚምቦጫረቅ የውሃ ድምፅ በማስቀደም”ስንት ናችሁ ? እጃችሁስ ከምን ? ” የሚል ምላሽ ተሰማ ።

” እንግዶቹ ሶስት ናቸው ። እኔ ደግሞ አራተኛው ነኝ ። እንግዶቹ ለእጅ መንሻ 30 ሺህ ብር ይዘዋልና ከሶስቱ አንዳቸው ገንዘቡን ያቀብሉህ ” ይላል ። ”አይሆንም ። በመጀመሪያው ቀጠሮ በአካል መገናኘት አይፈቀድም ። መጀመሪያ መፈተን አለባቸው ። ገንዘቡን እራስህ አቀብለኝ ” የሚል መልስ ተሰጠ ።

ጩሉሌው ገንዘቡን ተቀበለና አስቀድሞ በሐይቁ ዳርቻ እንዲመሽግ ላደረገው ጓደኛው አስረክቦ ተመለሰ ። ” ገንዘቡን ደርሶኛል ። ያሰባችሁትን እንዲሳካ የዛሬ 15 ቀን ልክ በዚህ ሰዓት 90 ሺህ ብር ይዛችሁ እንድትቀርቡ” የሚል ድምፅ ”ከቆሪጥ” ተሰማ ። የምትፈልጉት ሀብት ማግኘት የምትችሉት ግን በሚስጢር ጠባቂነታችሁ ልክ ይወሰናል የሚል ማሳሰቢያ ጭምር ተነገራቸው ።

በመጀመሪያው ጉዞ እያንዳንዳቸው 10 ሺህ ብር በሁለተኛው ዙር ደግሞ እያንዳንዳቸው 30 ሺህ ብር አዋጥተው በድምሩ 120 ሺህ ብር ለ” ቆሪጡ ” አስረከቡ ። ፍላጎታቸው ሊሳካ በሚችልበት ወቅት ሲወሰን ብቻ እንደሚመጡና ከዚያ በፊት ማንኛውም ጥያቄ ማቅረብ እንደማይችሉ ማስጠንቀቂያ ተሰጥቶአቸው ተሰናበቱ ።

እነሱም በተራቸው አብሮአቸው ለደከመውና ለተመላለሰው ጩሉሌ ውለታ ከፍለው ፣ ሚስጢራቸውን በጥብቅ እንዲጠብቅና ያሰቡት ሲሳካ ጠቀም ያለ ጉርሻ እንደሚሰጡት ቃል ገብተው አሰናበቱት ። 

ጉዳዩ ቀናት ሳምንታትን ፣ ሳምንታት ደግሞ ወራትን እያስከተሉ ድፍን አንድ ዓመት ቢሞላውም ደፍሮ የሚያነሳው አልተገኘም ። ገንዘባቸውን በፈቃዳቸው ሰጥተው መጠየቅም አስፈራቸው ። 

ጩሉሌዎቹ ሲያቀብጣቸው የሰሩትን አሻጥር እንደ ጀግንነት አወሩትና ሶስቱ ጓደኛሞች ዘንድ ደረሰ ። እሳት ለብሰው እሳት ጎርሰውና ማካሮቭ ሽጉጥ አቀባብለው ጩሉሌዎቹን ማሳደድ ጀመሩ ። ጉዳዩ በሽምግልና ተያዘና ከ120 ሺህ ብር ውስጥ ሳይጠፋ የተገኘው 40 ሺህ ብር እንዲመለስ በማድረግ ተቋጨ ።

አሁን ግን ”ቆሪጦች እጃቸውን ለቆራጦች ሰጥተዋል” ስምንቱ የቢሾፍቱ ሐይቆች የቢሊዮን ብር የኢንቨሰትመንት ምንጮች ፣ የቱሪዝም መስህቦቸና የውበት ጌጦች ሆነው ማገልገል ጀምረዋል ። ባለሃብቶቻችን በሀይቆቹ ዙሪያ ሰፍረው የሚታይ እውነታ ፣ የሚጨበጥ ልማትና ጠቀሚ የስራ ዕድል ፈጥረዋል ።

የቢሾፍቱ ከተማ አስተዳደር ከንቲባ ፅህፈት ቤት ሃላፊ አቶ መርድ አስፋው ለኢዜአ እንደገለፁት ከተማዋ የሰባት የተፈጥሮ ሐይቆችና የአንድ ሰው ሰራሽ ሀይቅ ባለቤት ናት ።  የተፈጥሮ ሐይቆቹ  ኩሪፍቱ  ፣ ቢሾፍቱ  ፣ ባቦጋያ ፣ ሆራ አርሰዲ ፣ መገሪሳ ፣ ኪሎሌና ጨለለቃ በሚል ስያሜ ሲጠሩ ሰው ሰራሽ  ሐይቁ ደግሞ  በልበላ ሐይቅ በሚል ስም ይታወቃል።

ክረምት ብቅ እያለ በበጋ ወራት አልፎ አልፎ ከሚደርቀው የጨለለቃ ሐይቅ በስተቀር ቀሪዎቹ በስፋታቸውም ሆነ በጥልቀታቸው የሚታወቁና የሽርሽር ጀልባዎች ጭምር በብዛት የሚንቀሳቀሱባቸው ትላልቅ ሐይቆች ናቸው ።

”ቆሪጥ” አለበት ተብሎ ሲፈራ በነበረው ቢሾፍቱ ሐይቅ ዳርቻ ድሪምላንድና ፒራሚድ የመሳሰሉ ድንቅ ሆቴሎች ተገንብተው የህዝቦች የደስታ ምንጭ ሆነዋል ። በባቦጋያና በኩሪፍቱ ሀይቆች ዙሪያ ደግሞ የጥራት ደረጃቸውን የጠበቁ ማርካን ፣ ኩሪፍቱ ፣ ባቦጋያ ፣ ሊሳክ ፣ ወያ ፣ ፔሊካንና አዱላላ የመሳሰሉ ሪሶርቶች ተሰርተው ለቱሪስቶች ማረፊያና ለዜጎች የስራ እድል ፈጠራ ምንጭ ሆነዋል ።

የሆራ አርሰዲ ሐይቅ ደግሞ በየዓመቱ በሚሊዮን የሚቆጠሩ ሰዎች የሚታደሙበትና የኦሮሞ ህዝብ የማንነት መገለጫ የሆነው የኢሬቻ በዓል የሚከበርበት ታሪካዊ ቦታ በመሆኑ የተለየ ክብር ይሰጠዋል ።

የከንቲባ ፅህፈት ቤቱ ሃላፊው እንደሚሉት በከተማዋ 8 ነጥብ 7 ቢሊዮን ብር ካፒታል ያላቸው 431 ባለሃብቶች የኢንቨስትመንት ፈቃድ ወስደው አብዛኛዎቹ ወደ ስራ ገብተዋል ።

ከባለሃብቶቹ መካከል 25 በመቶ የሚሆነው ካፒታላቸው በሀይቆቹ ዙሪያ ትላልቅ ዘመናዊ ሆቴሎችና ማራኪ ሪሶርቶች በመገንባት ኢንቨስት ያደረጉ ናቸው ። ባለሃብቶቹ በአፈ ታሪክ ብቻ ሲነገርላቸው የኖሩ ቆሪጦችን የደፈሩ ቆራጦች መሆናቸውን በተግባር አረጋግጠዋል ። 

የቢሾፍቱ ከተማ ባህልና ቱሪዝም ፅህፈት ቤት የሆቴሎችና ሬስቶራንቶች የብቃት ማረጋገጫ የስራ ሒደት ባለሙያ አቶ በቃሉ ፉፋ እንደገለፁት ወደ ከተማዋ የሚመጡ የአገር ውስጥና የውጭ ቱሪስቶች ቁጥር በየዓመቱ እየጨመረ በመምጣቱ አምና ከዘርፉ 270 ሚሊዮን ብር ገቢ ተገኝቷል ።

210 ሚሊዮን 277 ሺህ 739 ብር ገቢ የተገኘው ደግሞ ከተማዋን ከጎበኙ 91 ሺህ 667 የውጭ አገር ዜጎች ላይ ነው ። 252 ሺህ 194 የአገር ውስጥ ጎበኚዎች ሐይቆቹን ጨምሮ የከተማዋ አረንጓዴ አካባቢዎች ተዛዙረው መጎብኘታቸውን ከአቶ በቃሉ ገለፃ ለማወቅ ተችሏል ።

በ2010 ዓም ከተማዋን የጎበኙ የአገር ውስጥና የውጭ ቱሪስቶች ቁጥር ከ2006 ዓም ጋር ሲነፃፀር ከ260 ሺህ ወደ 343 ሺህ 861 ያደገ ሲሆን በገቢ ደረጃ ደግሞ ከአራት እጥፍ በላይ ብልጫ ማሳየቱን ከከተማዋ ባህልና ቱሪዝም ፅህፈት ቤት የተገኘው መረጃ ያመላክታል ።

ለእድገቱ ዋናው ምክንያት ደግሞ የሐይቆቹን ተፈጥሮአዊ ውበትና ሐይቆቹን ተከትለው የተገነቡ የመዝናኛ ማእከላት ቁጥር እየጨመሩ በመምጣታቸው ነው ተብሏል ።

በሀይቆቹ ዙሪያ በአገልግሎት ዘርፍ ከተቋቋሙት ተቋማት መካከል የአዱላላ ሪዞርት የኢቨንትስ ክፍል ሃላፊ አቶ ፋንታሁን ንዋይ በሰጡት አስተያየት ሀይቆቹ የመዝናኛ ማእከላቱ እስትንፋስ በመሆናቸው ተገቢው ጥበቃና እንክብካቤ ይደረግላቸዋል ። ሐይቆቹ ጠፉ ማለት በሌላ አገላለፅ በዙሪያቸው የተገነቡ ተቋማት ተዘጉ ማለት ነው ። 

የሊሳክ ሪሶርት ስራ አስኪያጅ አቶ ሳሙኤል ጌታሁን እንዳሉት ደግሞ ሪሶርት በተፈጥሮ መስህብ ላይ ተመስርቶ የሚቋቋም የሆቴል ዓይነት ሲሆን እሳቸው የሚመሩት ሪሶርት ህልውናው ከሐይቁ ነጥሎ ማየት ስለማይቻል ለሀይቁ ተገቢውን ጥበቃ እያደረገ መሆኑን አስረድተዋል ።

የከተማው አስተዳደር ከሐይቁ በሞተር እየተሳበ ለተለያዩ ስራዎች የሚወሰድ ውሃ እንዲከለከል በማድረግ ጭምር ቁጥጥር ማድረግ መጀመሩን በመልካም ጎኑ ያነሱት አቶ ሳሙኤል ሐይቁን ተከትለው ወደ ስራ የገቡ ተቋማት ለራሳቸው ሲሉ ተገቢውን ጥበቃና እንክብካቤ ማድረግ እንዳለባቸው መክረዋል ።

ከመዲናችን አዲስ አበባ በ42 ኪሎ ሜትር ርቀት ላይ የሚገኙ ስምንቱ የቢሾፍቱ ሐይቆች መታየት ያለባቸው ድንቅ የመዝናኛ ስፍራዎች ናቸው ። የከተማው አስተዳድር የበለጠ ሊያለማቸውና ሊያስተዋውቃቸው ይገባል ። የቅርብ ሩቅ ሆነው መቀጠል የለባቸውምና ለህዝብ የእይታ ማረፊያና ለከተማዋ ዋና የገቢ ምንጭ ማድረግ ጊዜ ሊሰጠው አይገባም ።

የኢትዮጵያ ዜና አገልግሎት
2015
ዓ.ም