ድርጊቱ በወንጀልም በዶላርም ያስቀጣል!

ገብረህይወት ካህሳይ ከኢዜአ

የዱር እንስሳትን በተሽከርካሪ ገጭቶ መግደል በህግ ያስጠይቃል ። አዎን ! ያስጠይቃል ። በአዋሽ ብሔራዊ ፓርክ ደግሞ በወንጀል ከማስጠየቁ ባሻገር በዶላር የተሰላ ክፍያንም ይጠይቃል። ሾፌሮቻችንስ ይህንን ያውቁ ይሆን ? በቅድሚያ የዶላሩ መጠን እንመልከት ።

አንድ ተራ ዝንጀሮ መግደል አንድ መቶ ዶላር ያስቀጣል። ነጭ ዝንጀሮ ከገደልክ ደግሞ 1 ሺህ ዶላር የማይቀር ዕዳ ነው ። የቀን ጎዶሎ አጋጥሞት ሳላ የተባለውን እንስሳ ለገደለማ 2 ሺህ ዶላር ዋጋ ተቆርጦለታል ።

የአዋሽ ብሄራዊ ፓርክ ፅህፈት ቤት ዋና ሃላፊ አቶ ሽፈራው መንግስቴ እንደገለፅሉኝ የባሰም ቅጣት አለ ። የሜዳ ፍየል 2ሺህ 600 ዶላር ያስከፍላል ። አምባራይሌ ደግሞ በጣም ውዱ የዱር እንስሳ ነው ። አምባራይሌን መግደል እስከ 3 ሺህ ዶላር ያስቀጣል ። የተገደለችው እንስሳ እንስት ከሆነችማ ዋጋው በእጥፍ ይጨምራል ። እየወለደች ትባዛ ነበር በሚል እሳቤ ነው ።

የተሽከርካሪ አደጋ ተቀጪዎቹ የኛዎቹ ሾፌሮች በተሽከርካሪ ተገጭተው የሚመቱትም የራሳችን የዱር እንስሳት መሆናቸው ደግሞ ጉዳቱን እጥፍ ድርብ ያደርገዋል ። አሁን እየተነጋገርን ያለነው የፍትሐ ብሔሩን ብቻ እንጂ የወንጀሉ ነገርማ መዘዙ የከፋ ነው ።

የአዋሽ ብሔራዊ ፓርክ በአፋር ክልል አዋሽ ፈንታሌና በኦሮሚያ ክልል ፈንታሌ ወረዳ ውስጥ ይገኛል ። ፓርኩ በ1958 ዓም ከሰሜን ተራሮች ብሄራዊ ፓርክ እኩል የተመሰረተ ነው ። በሀገራችን ከሁለቱ ቀዳሚ የመጀመሪያብሄራዊ ፓርኮች አንዱ ሲሆን 590 ስኩየር ኪሎ ሜትር ቦታን ያካልላል ።

ከአዲስ አበባ ወደ ምስራቅ የሀገራችን ክፍልና ወደ ጅቡቲ የሚወስዱት ዋናው የአስፋልት መንገድና የባቡር መስመር ፓርኩን አቋርጠው የሚያልፉ ሲሆን በጥንቃቄ ጉድለት የዱር እንሰሳትን ገጭተው በመግደል ተደጋጋሚ ጉዳት እንደሚያደርሱ የፓርኩ ሃላፊ ይገልፃሉ ።

የባቡር መሰመሩም ሆነ የአስፋልት መንገዱ ሲሰሩ የፓርኩ የእንስሳት እንቅስቃሴን ታሳቢ ያደረጉ አይደሉም ።የማቋረጫ መንገዶችም የላቸውም ። ከልክ ያለፈ ፍጥነት ደግሞ ለአደጋው መባባስ ምክንያት ሆኗል ይላሉ ።

በፓርኩ የዱር እንስሳት ላይ የመግጨት አደጋ የሚያደርሱ አሽከርካሪዎች በህግ መጠየቃቸው ተገቢ ቢሆንም ለምን በውጭ ምንዛሪ እንዲቀጡ ይደረጋል ? ለምንስ ይህን ያክል ተወደደ ? ለሚሉት ጥያቄዎች የአቶ ሽፈራው መንግስቴ ምላሽ የሚከተለው ነው ።

”ለባቡርና ለመኪና አደጋ ተብሎ የተቀመጠ የቅጣት መጠን የለም ። ነገር ግን ዕድሜአቸው ለገፉ የዱር እንስሳት የተቀመጠ የአደን ዋጋ አለ ። ስለዚህ አደጋውን የሚያደርሱ አሽከርካሪዎች በአደን ዋጋ መሰረት እንዲከፍሉ ይደረጋል ። ላረጁ እንሰሳት በወጣው ተመን ስለሚከፍሉ ውድ የሚባል አይደለም ” ባይ ናቸው ።

ፓርኩ በተፈጥሮ ሀብት የታደለ ፣ በዩኔስኮ ጭምር የተመዘገበና የበርካታ ጎብኚዎች መዳረሻ ነው ። በውስጡ 81 አጥቢ የዱር እንስሳት ዝርያዎች አሉት ። በኢትዮጵያ ብቻ የምትገኘው ባለብጫ ማንቁርት ወፍን ጨምሮ የ451 የአእዋፍ ዝሪያዎች መኖሪያ ነው ።

ከአባይ ወንዝ ቀጥሎ በአገራችን ሁለተኛው ትልቁ ፋፏቴ ፣ ፍል ውሃና የፈንታሌ ተራራ የቀድሞ የእሳተ ጎመራ ምልክቶች ደግሞ የአዋሽ ብሔራዊ ፓርክ ልዩ ገፀ-በረከቶች ናቸው ።

አሁን ላይ ግን ፓርኩ ለከፋ አደጋ ተጋልጧል ። በኦሮሚያ ክልል የፈንታሌና በአፋር ክልል የአዋሽ ፈንታሌ ወረዳ አርሶ አደሮች እንስሳቶቻቸውን ወደ ፓርኩ በማስገባት ልቅ የሆነ ግጦሽ በማካሔድ ፣ ደንን አለአግባብ በመመንጠርና በፓርኩ ውስጥ ከሰል በማክሰል ተገቢ ያልሆነ ተፅእኖ እያሳደሩበት ነው ።

በተለይ ከልቅ ግጦሽ ጋር ተያይዘው የሚፈጠሩ ችግሮችን ለማስተካከል በሚደረገው ጥረት በፓርኩ ሰራተኞች ላይ የሞት ፣ የመቁሰልና የመደብደብ ጉዳት የሚያስከትልበት ጊዜ በመኖሩ ሰራተኞቹ እየለቀቁ ግማሽ የሚሆነው የስራ መደብ ባዶ መቅረቱን ሃላፊው ይናገራሉ ።

ፕሮሶፒስና ፓርቲኒየም የተባሉ መጤ ወራሪ አረሞች በፓርኩ ውስጥ እየተስፋፉ መምጣታቸው ደግሞ ችግሩ በእንቅርት ላይ ... አድርገውታል ። እንደ ፓርኩ ዋና ሃላፊ ገለፃ ”ለዱር እንስሳቱ ምግብ የሚሆኑ ሳሮችና ቅጠላቅጠሎችን እያጠፉ ነው ” ።

በፓርኩ ላይ የተፈጠረው ድርብርብ ችግር የዱር እንስሳት ሀብቱ እንዲጠፉና እንዲመናመኑ ምክንያት ሆኗል ። ለአብነትም በፓርኩ ውስጥ ይገኙ የነበሩ የሜዳ አህያ ፣ ቆርኬዎችና የሰጎን ዝርያዎች ሙሉ በሙሉ ጠፍተዋል ።

የሳላ ቁጥር ከ189 ወደ 94 ፣ የአምበራይሌ ቁጥር ደግሞ ከ2 ሺህ ወደ 1ሺህ 060 ዝቅ ማለቱን አቶ ሽፈራው በማሳያነት አንስተዋል ።

የፓርኩ ዋና ሃላፊ የተከሰተው ችግር የተዘበራረቀ ስሜት እንደፈጠረባቸው ይገልፃሉ ። ችግሩ በዚሁ ከቀጠለ በአጭር ጊዜ ውስጥ ፓርኩ እያየነው ሊጠፋ ይችላል የሚል ስጋት አላቸው ። 

መልሰው ደግሞ ”ተስፋችን ሙሉ ለሙሉ ተሟጥጦ አላለቀም ” ይላሉ ። ምክንያታቸው ደግሞ ”ሁሉም ባለድርሻ አካላት ለመፍትሔው ከተረባረቡ ፓርኩን ልናድነው እንችላለን” የሚል ተስፋ በመያዛቸው ነው ።

ህዝባችንን በመምከር ፣ በማስተማርና ከድርጊታቸው የማይታቀቡትን ደግሞ በሀግ እንዲጠየቁ በማድረግ ፓርኩን ከጥፋት እንታደገዋለን ሲሉ የኦሮሚያና የአፋር ክልል የፖሊስ ሃላፊዎችም አወንታዊ ምላሽ ሰጥተዋል ።

በኦሮሚያ ክልል የምስራቅ ሸዋ ዞን ፖሊስ አዛዥ ኮማንደር ሽፈራው ጉቱ በሰጡት አስተያየት ”ፓርኩ ለአደጋ መጋለጡን በማረጋገጣችን በአንድ በኩል ጉዳት የሚያደርሱ የአካባቢው ነዋሪዎች ፓርኩ የጋራ የአገር ሀብት መሆኑን በቂ ግንዛቤ እንዲጨብጡ በማድረግ በሌላ በኩል ደግሞ ከስህተታቸው የማይታቀቡትን በህግ የሚጠየቁበት መንገድ እንከተላለን ” ብለዋል ።

” በአሁኑ ጊዜ እየታየ ካለው ጉዳት አንፃር በፓርኩ የነበሩ አንዳንድ የዱር እንስሳት በዓይን የማይታዩበት ደረጃ በመደረሱ ፓርኩን ጠቅልሎ እንዳይጠፋ የተቀናጀ የማዳን ስራ እናከናውናለን” ሲሉም ኮማንደሩ ዝግጁነታቸውን ገልፀዋል።

በአፋር ክልል ዞን ሶስት የአዋሽ ፈንታሌ ወረዳ ፖሊስ ፅህፈት ቤት የኮሙኒቲ ፖሊሲንግ ሃላፊ ምክትል ሳጅን ሙሳ መሀመድ ” ፓርኩ የሀገር ሀብት በመሆኑ ከተጋረጠበት ስጋት ለማዳን ከማንኛውም ጥቃት ለመከላከል ተባብረን እንሰራለን ” የሚል ሃሳብ ሰንዝረዋል ።

”ግጦሽ ፍለጋ ወደ ፓርኩ እንስሳት የሚነዱም ሆነ በክልሉ ተፅእኖ በሚፈጥሩ ነዋሪዎች ላይ የማስተካከያ እርምጃ በመውሰድ ሃላፊነታችንን እንወጣለን ” ሲሉ ስጋቱን እንደሚጋሩትና ለመፍትሔው እንደሚሰለፉ ገልፀዋል ።

ሁላችንም በአንድ ልብ ተባብረን ለመፍትሔው ከሰራን ፓርኩ ወደ ቀድሞ ይዞታው ይመለሳል ሲሉም ብሩህ ተስፋ እንደሚታያቸው ጠቁመዋል ።

የችግሩ መንስኤዎችና የውጤቱ ተጎጂዎች እኛው ነን ። ዋነኛው የመፍትሔው አካል መሆን ደግሞ በእኛው ጫንቃ ላይ የወደቀ ነው ። ዓይናችን እያየ እንዳናጣው ተረባርበን ከጉድ እናውጣው ።