ሰላም የጋራ አሸናፊነት መሳሪያ

በኤልያስ ጅብሪል (ኢዜአ)

ሰላም የሁሉ ነገር ዋስትና ነው፡፡ ሰርቶ የመለወጥ፣ ወልዶ የማሳደግ፣ ወጥቶ የመግባት፣ ዘርቶ የማፍራት በአጠቃላይ በሰው ልጆች የእለት ተእለት ተግባር ውስጥ ከምንተነፍሰው አየር ያልተናነሰ ዋጋ አለው፡፡ ሰላም ከሌለ ነገ የለም፡፡ ስለ ነገ ማሰብም ማቀድም የሚቻለው በሰላም ውስጥ ነው፡፡ የሰላምን ምንነት ለመረዳት ሰላም የግጭትና ጦርነት አለመኖር፣ በሰዎች መካከል የመቀራረብ፣ የመግባባትና ግጭቶችን በንግግር የመፍታትና የመምራት ሁኔታን ይመለከታል፡፡

ሰዎች ከራሳቸውና ከአካባቢያቸው ጋር ሰላም ኖሯቸው ለጋራ እድገትና አብሮ መኖር አስተዋጽኦ ካደረጉ ሰላም አለ ማለት ነው፡፡ በእያንዳንዱ ሕብረተሰብ ዘንድ ውስጣዊና ውጫዊ ስምምነት (Harmony) ካለ ሰላም አለ ለማለት ይቻላል፡፡ ስለዚህ ሰላም ከፖለቲካዊ፣ ኢኮኖሚያዊና ማህበራዊ ኑሮ ባሻገር ሰዎች ከሰዎች፣ ከተፈጥሮና ከአካባቢ ጋር ያላቸውን ግንኙነት ስለሚመለከት ሰላም ሁሉን አቀፍ(Holistic) ይዘት አለው፡፡

በሀገር ደረጃ ባለፉት ዓመታት ሰላምን ለማስፈን የሰላም ሚኒስቴር ከማቋቋም ጀምሮ በርካታ ሥራዎች ተሰርተዋል። ማኅበረሰቡን ያሳተፈ የዳበረ ዴሞክራሲን የማጽናት፣ የላቀ ብሔራዊ መግባባትን የመፍጠር፣ የሰላም ግንዛቤና ሁለንተናዊ ተሳትፎን የማሳደግ የውይይት መድረኮች ተካሂደዋል።

በተጨማሪም ማህበራዊ ሀብቶቻችንንና ባህላዊ እሴቶቻችንን በመገንባት ሂደት በተለይም የሰላም እናቶች፣ የሀገር ሽማግሌዎችና የኃይማኖት ተቋማት በባለቤትነት እንዲሳተፉና እንዲያግዙ በማድረግ ለዘላቂ ሰላም ምቹ ምህዳር ተፈጥሯል። ከሲቪክ ማኅበረሰቡ ጋር በመሆን ሰላምን በማስፋፋት፣ ግጭትን በመከላከልና ዴሞክራሲን በማስፈን ላይ በቅንጅት ለመሥራትም ተሞክሯል።

“ሰላም ማለት የግጭት አለመኖር ማለት አይደለም“ የሚሉት የሰላምና ደኅንነት ባለሙያዎች ኢትዮጵያ ውስጥ ጦርነት ባልነበረባቸው ዘመናት ሁሉ፣ ለግጭት የሚዳርጉ ቅራኔዎች መብላላታቸውን አያቋርጡም፡፡  በመሆኑም ጊዜ ጠብቀው ለግጭት መንስኤ መሆናቸው የማይቀር ሃቅ ነው፡፡ ሆኖም ግን ቅራኔን በመነጋገርና በመወያየት ከመፍታት ይልቅ በኃይል መፍትሔ መፈለጉ ተለምዷል፡፡ የግጭት አዙሪት ያለበት ማኅበረሰብ ደግሞ ስነ-ልቦናው ግጭት ላይ የተመሰረተ እንደሚሆን ይታመናል፡፡

በኢትዮጵያ ታሪክ ግጭቶች ሌላ ግጭት እየወለዱ የግጭት አዙሪት ውስጥ ተነክረን ሰላም አልባ ዘመናትን አሳልፈናል፡፡ ለዚህም ነው ብሪታንያዊው የዴቨሎፕመንታል ኢኮኖሚክስ ፕሮፌሰር ሰር ፖውል ኮሊር ድሃ አገራት በድህነታቸው እንዲቀጥሉ ካደረጋቸው የልማት ወጥመድ መካከል አንዱ የግጭት ወጥመድ እንደሆነ ይገልጻሉ። ፕሮፌሰሩ የእርስ በርስ ግጭት አንድን አገር ከፍተኛ የኢኮኖሚ ውድመት ውስጥ እንደሚከትና በተለይ የእርስ በርስ ግጭቱ እየተራዘመ በመጣ ቁጥር ከግጭቱ የሚያተርፉ አካላት እየበረከቱ ስለሚመጡ ለቀጣዩ ግጭት መፈጠር በር የሚከፍት ይሆናል ይላሉ፡፡

ለዘመናት ሲዘሩ የቆዩ የጥላቻና የመከፋፈል ዘሮች ፍሬ አፍርተው ሕብረተሰባችንን ያስተሳሰሩት ክሮች እየላሉና እየተበጣጠሱ የመጡበትና ተስፋ መቁረጥ የተንሰራፉበት ስለሆነ ከበድ ያሉ መንገራገጮችን (shocks) ልንቋቋም የማንችልበት ደረጃ ላይ አድርሰውናል፡፡ ይህም “ምክንያታዊ” ሆነን ሰላምንና የሰላምን መንገድ መውሰድ አማራጭ የሌለው መሆኑን ያሳየናል፡፡

በዚህ ረገድ መንግሥት ፍትሃዊነትን በማስፈን፣ ዲሞክራሲን በማስረፅ፣ የፍትሕ ተቋማትንም ገለልተኛ እንዲሆኑ በማድረግ ለዜጎች ለሰላም ትኩረት መስጠቱ እንደተጠበቀ ሆኖ  በሰላም ዙሪያ የሚሰሩ አካላት  የሃይማኖት ተቋማት፣ የአገር ሽማግሌዎች በእርግጥ አሁን ባለንበት ሁኔታ ሰላምን ለማስፈን ከእኛ ምን ይጠበቃል ብለው ራሳቸውን መጠየቅና ተግተው መስራት ይኖርማቸዋል፡፡

በተለያዩ የዓለማችን ክፍሎች ስለ ሰላም የተሰሩ ሥራዎችን የተመለከትን እንደሆነ ለሰላም የተከፈለውን ዋጋ በእጅጉ እንድናይ ያደርገናል። የሕንድ የነፃነት አባት የሆነውን ማህተመ ጋንዲን ስናነሳ  ፀረ-ቅኝ አገዛዝ ትግሉን በድል የተወጣው በሰላማዊ መንገድ ነው፡፡ ሰላማዊ ትግል ዋጋ እንደሚያስከፍል የታወቀ ቢሆንም ምናልባት ጦርነት ከሚያስከፍለው ሊያንስ ይችላል፡፡ ዋናው ነገር ግን በሰላማዊ መንገድ የተገኘ ድል ዘላቂነት ይኖረዋል፡፡ ይህ ብቻም ሳይሆን ሰላማዊ ትግል የማካሄድ እንቅስቃሴ የሚመሠረትበት መርህ ከሰው ልጅ የኑሮ ግብና ዓላማ፣ ከሕይወት ምንነት፣ ከሰላምና ግጭት/ጦርነት ተቃራኒነት አንጻር ሲታይ የሰላም መንገድ ሚዛን ስለሚደፋ ነው፡፡ በእርግጥ ጋንዲ “ጉልበት የእንስሳት እንደሆነ ሁሉ ሰላም የሰው ልጆች መንገድ ነው፡፡ ጉልበትን ብቻ የሚረዳ እንስሳ ብቻ ነው፡፡ ምክንያቱም በእነሱ ዘንድ መንፈስ ንቁ አይደለም፡፡ የሰው ክብር ከፍ ላለ ሕግ (የመንፈስ ጥንካሬ) መገዛትን ይጠይቃል፡፡ በጉልበት የተገኘ ድል ከሽንፈት እኩል ነው፡፡ ምክንያቱም ጊዜያዊ ስለሆነ፡፡ ደካማ ይቅር ማለት አይችልም፤ ይቅርታ የትልቅነት/የጥንካሬ ምልክት ነው” በማለት ይገልጸዋል፡፡

ጋንዲን በሚያስታውሰን መልኩ አሜሪካዊው የሰብአዊ መብት ተሟጋች ማርቲን ሉተር ኪንግ በበኩሉ “ጨለማ ጨለማን አያስወግድም፤ ጨለማን የሚያስወግድ ብርሃን ብቻ ነው፡፡ ጥላቻ ጥላቻን አያጠፋም፤ ፍቅር ጥላቻን ያጠፋል፤” በማለት የሰላምን ምንነትና ወሳኝነት ገልጿል፡፡

የቀድሞው የደቡብ አፍሪካ ፕሬዝዳንት የነበሩት ኔልሰን ማንዴላ የፍቅር፣ የሰላም፣ የይቅርባይነት፣ የአንድነትና የመልካም አመራር ሰጪነትና የለውጥ አመራር ምሳሌ እንደሆኑ ይነገራል። ታዲያ! እሳቸው በግዞት በሮቢን ደሴት ለ27 ዓመታት በእሥር ቆይተው ሲፈቱ ለመላው ዓለም በቀጥታ የሬዲዮና የቴሌቪዥን ሥርጭት የተላለፈ ንግግር አድርገው ነበር። በንግግራቸውም እንዲህ አሉ ከሁሉም በላይ ለሰላምና ለእርቅ ሁሉም እኩል ሆኖ ለሚኖርባት አገር መፈጠር ቅድሚያ እንዲሰጥ ሲሉም አሳሰቡ። የሰላምንና የእርቅን ዋጋ ቀድመው በመረዳታቸው።

ወደ አገራችን ነባራዊ ሁኔታ ስንመለስም ኢትዮጵያና ህዝቦቿ ምን ያህል ሰላም ወዳድ እንደሆኑ እንረዳለን፡፡ለአብነትም ለአሸባሪው ህወሃት የተሰጡ የሰላም አማራጮችን መመልከት ይቻላል፡፡ቡድኑ አራት አምስት ጊዜ የሰላም አማራጮች ቀርበውለት ፊቱን ሊያዞርም ፤ ኢትዮጵያውያን ግን ያልሻረ ቁስል ይዘው እንኳ እጃቸውን ለሰላም ከመዘርጋት ተቆጥበው አያቁም፤ የሰላምን ዋጋ ያውቁታልና።

ጠቅላይ ሚኒስትር ዐቢይ አሕመድ ሰኔ 07 ቀን 2014 ዓ.ም ለሕዝብ ተወካዮች ምክር ቤት አባላት ባስተላለፉት መልዕክት “ከማንኛውም ሰላም ፈላጊ አካል ጋር የምንፈልገው ሰላም ነው፤ የሚቻል ከሆነ ለሰላም መቆም ችግር የለውም”  ነበር ያሉት፡፡ ጠቅላይ ሚኒስትሩ ከጦርነት ምንም ትርፍ እንደሌለው በተለይ አምራች የሆነው ወጣቱ ክፍል እየረገፈና አገራችን ኢትዮጵያም ለጦርነቱ ተብሎ የምታወጣው ከፍተኛ ገንዘብ የኢኮኖሚ አቅሟን ምን ያህል ሊፈታተናት እንደሚችል አጽንኦት ሰጥተው ነበር የተናገሩት፡፡

በአሥር ዓመቱ የልማት ዕቅድ የሰላም ዘርፍ ልማት የሀገራችንና የሕዝቦቿን ዘላቂ ሰላም መረጋገጥ፤ አብሮነትና የሕግ የበላይነትን ማስፈን የዕቅዱ ዋና ዋና ዓላማዎች ሆነው የተቀመጡ ናቸው። የዜጎችን የውስጠ ሰላም የጥልቀት ዕድገት በ2022 ዓ.ም ወደ 85 በመቶ የማድረስ ግብ በልማት ዕቅዱ ተቀምጧል።

የሕግ የበላይነትን ለማረጋገጥ፣ በማኅበረሰቡ፣ በፖሊስና በጸጥታ ተቋማት መካከል መተማመንን ደግሞ 95 በመቶ የማሳደግ ዕቅድ ተይዞ እየተሰራ ነው። በቀጣናው ባሉ ሀገራት መካከል ግንኙነትና ትብብርን በማጠናከር ድንበር ዘለል የተደራጁ ወንጀሎችና ሽብርተኝነትን በ2022 ወደ 2 ነጥብ 5 በመቶ የመቀነስ ሥራም እየተከናወነ ነው። ይህም ለሰላም መረጋገጥ የሚኖረውን ፋይዳ ከፍ እንዲል ያደርገዋል። በተለይ ከጎረቤት አገሮች ጋር ያለውን ግንኙነት በማጠናከሩ ረገድ በሶማሌያና በኬንያ እንዲሁም በደቡብ ሱዳን ድርድሮች ኢትዮጵያ የተሳተፈችው በቀጣናው ሰላም ለማስፈን ከማሰብ ነው፡፡ በየአቅጣጫው ለሰላም የሚከፈለው መስዋዕትነት ከምንም በላይ ነው፡፡

የኢትዮጵያ የሰላም ፖሊሲና የማስፈጸሚያ ፍኖተ-ካርታን ማዕከል ያደረገ፣ ሰላምን በግለሰብ፣ በቤተሰብ፣ በማኅበረሰብና በተቋም ደረጃ በማስረጽ፣ የዜጎችን፣ ወጣቶችን በጎፈቃደኝነትንና የመስጠት ዜግነታዊ ኃላፊነትን የህይወት ዘመን ባህል እንዲሆን በማድረግ፣ ማህበራዊ ሃብቶች፣ እሴቶችና ብሔራዊ ጥቅሞች በተልዕኮ ስምሪት ውስጥ ተካተው በመተግበር ሁለንተናዊ ዘላቂ ሰላምን የመገንባት ሥራ ተግባራዊ ማድረግን ይጠይቃል።

ሰላምን ለማምጣት ከታሪካዊ ቅራኔዎቻችን ይልቅ ለታሪካዊ መግባባታችን ቅድሚያ መስጠት ያስፈልጋል፡፡ በእርግጥ ኢትዮጵያ ሰላም፣ ፍቅርና ብልፅግና ትመኛለች፡፡ ለዚህ ምኞት ተግባራዊነትም ኢትዮጵያዊ በሙሉ እንደ እህትና እንደ ወንድም በአንድነት ለመነጋገር፣ ለመሥራት እንዲሁም በጋራ ለመጠቀም በንጹህ ልቦና መዘጋጀትን ይጠይቃል፡፡  ለዚህም ነው ማርቲን ሉተር ኪንግ  “እንደ እህትና ወንድም በጋራ መኖርን መለማመድ አለብን ይህን ማድረግ ከተሳነን በጋራ እንጠፋለን” ያለው፡፡ በመሆኑም የጋራ አሸናፊነት መሳሪያ የሆነውን ሰላም ማንገብ ጠቀሜታው የጎላ በመሆኑ የግጭት ነጋዴዎች ቆም ብለው ሊያስቡ ይገባል።