የወልዲያ ዩኒቨርሲቲ እያንዳንዱ ንብረት በአሸባሪው ህወሓት ወድሟል፤ ተዘርፏል

200

ታህሳስ 14/2014(ኢዜአ) የወልዲያ ዩኒቨርሲቲ እያንዳንዱ ንብረት በአሸባሪው ህወሓት ተዘርፏል፤ ቀሪው አገልግሎት እንዳይሰጥ ሆኖ ወድሟል።

አሻባሪው ህወሓት በወልዲያ እና አካባቢው በወረራ በቆየባቸው ወራት ዩኒቨርሲቲውን ጨምሮ በርካታ የህዝብና የግለሰብ ንብረቶችን ዘርፏል፤ ያልቻለውን አውድሟል።

የወልዲያ የኒቨርሲቲ ፕሬዝዳንት ዶክተር አበበ ግርማ እንደገለጹት የዩኒቨርሲቲው እያንዳንዱ ንብረት በአሸባሪው ህወሓት ተዘርፏል፤ ቀሪው አገልግሎት እንዳይሰጥ ሆኖ ወድሟል።

በዚህም ከ6 ቢሊዮን ብር በላይ የሚገመት ንብረት ዩኒቨርሲቲው ማጣቱን ጠቅሰዋል።

አገር የማፍረስ እቅድ ይዞ የተነሳው አሸባሪ ቡድን በአካባቢው በቆየባቸው ጊዜያት ያልፈፀመው ተግባር ያላደረሰው ውድመት እንደሌለም ዶክተር  አበበ ገልጸዋል።

አሸባሪው ህወሃት የዩኒቨርሲቲውን ቢሮዎች ክፉኛ ሰባብሯል፣ የላብራቶሪ እቃዎች እና የኮምፒተሮች፣ የዩኒቨርሲቲው ገስት ሀውስ፣ አይሲቲ ክፍሎች፣  ላይብረሪና ኢ-ላይብራሪ  ህንፃውና በውስጡ የነበሩ ንብረቶች  ዘረፋና ከፍተኛ ውድመት ተፈፅሞባቸዋል ብለዋል።

ሆኖም የዩኒቨርሲቲውን መሰረታዊ መማር ማስተማር  በሂደት ለማስጀመር የሚያስችል መርሃ ግብር  ተቀምጦ እየተሰራ መሆኑን ጠቅሰዋል።

የሽብር ቡድኑ ኢትዮጵያዊያን የሚማሩባቸውን፣ የሚታከሙባቸውን እንዲሁም የተለያዩ አገልግሎቶች የሚያገኙባቸውንና ሰርተው ኑሯቸውን የሚደጉሙባቸውን ፋብሪካዎች 

ጭምር በመዝረፍና በማውደም የክፋት ጥጉን አሳይቷል ብለዋል።

ቀደም ሲል በዩኒቨርሲቲው በመምህርነት የሰሩና የተማሩ ጭምር አሁን ላይ የአሸባሪው 

ቡድን አባል በመሆን “የበሉበትን ወጭት ሰባሪ” ሆነው መገኘታቸውን  አረጋግጠናል ብለዋል ዶክተር አበበ።

በዩኒቨርሲቲው ላይ የተፈፀመው ዘረፋና ውድመት የከፋ ቢሆንም የአጭር፣ የመካከለኛ እና የረጅም ጊዜ እቅድ በማውጣት ወደ ነበረበት ለመመለስ ጥረት ይደረጋል ብለዋል።