ኀብረተሰቡ በህልውና ዘመቻው እየተመዘገበ ባለው ድል ሳይዘናጋ አሁንም አካባቢውን በንቃት መጠበቅ አለበት

ህዳር 29/2014 (ኢዜአ) ኀብረተሰቡ በህልውና ዘመቻው እየተመዘገበ ባለው ድል ሳይዘናጋ አሁንም አካባቢውን በንቃት መጠበቅ እንዳለበት የአዲስ አበባ ፖሊስ ኮሚሽን ጥሪ አቀረበ ፡፡
 ^{የአዲስ አበባ ፖሊስ ኮሚሽን የህዝብ ግኑኝነት ኃላፊ ኮማንደር ፋሲካ  ፋንታ እንዳሉት የከተማዋ ፖሊስ ከህብረተሰቡ ጋር ተቀናጅቶ እያከናውነ ባለው ስራ የመዲናዋን ሰላም በአስተማማኝ ሁኔታ ማስጠበቅ መቻሉን ገልጸዋል፡፡}

^{በዚህም የአዲስ አበባን ሰላም ለማወክ የሚሹ የአሸባሪ ኃይሎችን ፍላጎት ማክሸፍ መቻሉን ነው የተናገሩት፡፡}

^{ኀብረተሰቡ መረጃ ከመስጠት ጀምሮ አካባቢውን ነቅቶ በመጠበቅ ረገድ እያበረከተ ያለው አስተዋጽኦ ከፍተኛ መሆኑንም ኮማንደር ፋሲካው ገልጸዋል፡፡}

^{በተጨማሪም ፓሊስ ከኀብረተሰቡ ባገኘው ጥቆማና ባደረገው ተከታታይ ፍተሻ ለጥፋት ማስፈጸሚያ ሊውሉ የነበሩ የተለያዩ የጦር መሳሪያዎችንና ንብረቶችን መያዙንም አስታውሰዋል፡፡}

^{በቁጥጥር ስር ከዋሉ የጦር መሳሪያዎች መካከል በግለሰብ እጅ ሊኖሩ የማይገባቸው ቦንቦች እና የጦር ሜዳ መነፅሮች እንደሚገኙበትም ለአብነት ጠቅሰዋል፡፡}

^{በመሆኑም ኀብረተሰቡ በህልወና ዘመቻው እየተመዘገበ ባለው ድል ሳይዘናጋ አካባቢውን ነቅቶ የመጠበቁን ስራ አጠናክሮ እንዲቀጥል ጥሪ አቅርበዋል፡፡}

^{ኀብረተሰቡ አጠራጣሪ ነገሮች ሲመለከት እንደከዚህ ቀደሙ ለጸጥታ አካላት ጥቆማ መስጠት እንዳለበት ገልጸው፤ ፖሊስ ለሚደርሱት ጥቆማዎች አፋጣኝ ምላሽ ለመስጠት ሁሌም ዝግጁ መሆኑን ተናግረዋል ፡፡}

^{ኀብረተሰቡ በአካባቢው አጠራጣሪ ሁኔታዎች ሲያጋጥመው በነጻ የስልክ መስመር  991 በመደወል አሊያም በአካባቢያቸው ለሚገኙ ማህበረሰብ አቀፍ ፖሊስ አባላት ጥቆማ መስጠት እንደሚችል አስታውቀዋል ፡፡}